kabhi kabhi to zindagiyan

kabhī kabhī to zindagiyāñ kuchh itne vaqt meñ apnī murādeñ hāsil kar letī haiñ

jitne vaqt meñ luqma plate se muñh meñ pahuñchtā hai... aur

aksar aisī murādoñ kī to pahuñch bhī luqmoñ tak hotī hai

aur jab aisī manzileñ bārvar hotī haiñ to shahr panapte haiñ aur gaañv phabakte haiñ… aur

tahzīboñ kī manDiyoñ meñ har jānib qistāsoñ kī TeḌhī DanDiyāñ roz o shab tezī tezī se

insānoñ kī jholiyoñ meñ rizqoñ kī dhaḌyāñ ulaTtī haiñ aur

bhare samājoñ meñ shuddh talqīnoñ kī DauDiyāñ pīTne vaale bhī apnī apnī paġhambariyoñ kī tanḳhvāheñ paate haiñ

lekin kis ko ḳhabar hai aisī bhī haiñ manzileñ jin tak jaane vaale rāstoñ par na duā kā saaya hai na qazā kā gaḌhā hai

kuchh hai bhī to bas apnī sochoñ kī dhajjiyoñ meñ simTī huī ik bechārgī jis kī be-sadā

huuk meñ umreñ Duub jaatī haiñ

aur qutboñ se qutboñ tak uḌ uḌ kar jaane vaale thake paroñ kī kamāneñ bhī to

ik manzil pe chamaktī ābnāo kī samt lachak jaatī haiñ

lekin haa.e vo manzileñ jin tak har sachchā.ī rasta hai aur har sachchā.ī maut kā jiitā naam hai

kabhi kabhi to zindagiyan kuchh itne waqt mein apni muraden hasil kar leti hain

jitne waqt mein luqma plate se munh mein pahunchta hai aur

aksar aisi muradon ki to pahunch bhi luqmon tak hoti hai

aur jab aisi manzilen barwar hoti hain to shahr panapte hain aur ganw phabakte hain… aur

tahzibon ki manDiyon mein har jaanib qistason ki TeDhi DanDiyan roz o shab tezi tezi se

insanon ki jholiyon mein rizqon ki dhaDyan ulaTti hain aur

bhare samajon mein shuddh talqinon ki DauDiyan piTne wale bhi apni apni paghambariyon ki tanKHwahen pate hain

lekin kis ko KHabar hai aisi bhi hain manzilen jin tak jaane wale raston par na dua ka saya hai na qaza ka gaDha hai

kuchh hai bhi to bas apni sochon ki dhajjiyon mein simTi hui ek bechaargi jis ki be-sada

huk mein umren Dub jati hain

aur qutbon se qutbon tak uD uD kar jaane wale thake paron ki kamanen bhi to

ek manzil pe chamakti aabnao ki samt lachak jati hain

lekin hae wo manzilen jin tak har sachchai rasta hai aur har sachchai maut ka jita nam hai