kafan-chor

kuchh nahīñ, ghar meñ mire kuchh bhī nahīñ

koī kapḌā ki harārat ko badan meñ rakhtā

luqma-e-nān-e-javīñ ḳhuun ko dhakkā detā

man ko garmātā sakūñ, tan se lipaTtā bistar

kuchh nahīñ, kuchh bhī nahīñ, kuchh bhī nahīñ!

raat ko jism se chipkātī huī sard havā

jism ke band masāmoñ meñ utartī ThanDak

sañg-e-marmar sī huiiñ ḳhuun tarastī poreñ

haath larzāñ the umīdoñ ne magar thaam liye

paañv chalte hī rahe shahr-e-ḳhamoshāñ kī taraf

parda-e-ḳhāk meñ lipTe hue be-jān vajūd!

bā.is-e-nañg-e-zamīñ huuñ, magar ik baat batā

jism miTTī ho to kapḌoñ kī zarūrat kyā hai?

dekh! paivand-e-zamīñ! mere tan-e-uryāñ par

dāġh-e-aflās kā paivand... ijāzat de de

mar ke marte hue insān ko zinda kar de

ek malbūs kamāne kī ijāzat de de!

varna bhūkī hai bahut ḳhāk, kahāñ dekhegī

jism khā jā.egī poshāk kahāñ dekhegī!

kuchh nahin, ghar mein mere kuchh bhi nahin

koi kapDa ki hararat ko badan mein rakhta

luqma-e-nan-e-jawin KHun ko dhakka deta

man ko garmata sakun, tan se lipaTta bistar

kuchh nahin, kuchh bhi nahin, kuchh bhi nahin!

raat ko jism se chipkati hui sard hawa

jism ke band masamon mein utarti ThanDak

sang-e-marmar si huin KHun tarasti poren

hath larzan the umidon ne magar tham liye

panw chalte hi rahe shahr-e-KHamoshan ki taraf

parda-e-KHak mein lipTe hue be-jaan wajud!

bais-e-nang-e-zamin hun, magar ek baat bata

jism miTTi ho to kapDon ki zarurat kya hai?

dekh! paiwand-e-zamin! mere tan-e-uryan par

dagh-e-aflas ka paiwand ijazat de de

mar ke marte hue insan ko zinda kar de

ek malbus kamane ki ijazat de de!

warna bhuki hai bahut KHak, kahan dekhegi

jism kha jaegi poshak kahan dekhegi!