kahan jaoge

aur kuchh der meñ luT jā.egā har baam pe chāñd

aks kho jā.eñge ā.īne taras jā.eñge

arsh ke dīda-e-namnāk se bārī-bārī

sab sitāre sar-e-ḳhāshāk baras jā.eñge

aas ke maare thake haare shabistānoñ meñ

apnī tanhā.ī sameTegā, bichhā.egā koī

bevafā.ī kī ghaḌī, tark-e-madārāt kā vaqt

is ghaḌī apne sivā yaad na aa.egā koī

tark-e-duniyā kā samāñ ḳhatm-e-mulāqāt kā vaqt

is ghaḌī ai dil-e-āvāra kahāñ jāoge

is ghaḌī koī kasī kā bhī nahīñ rahne do

koī is vaqt mile gā hī nahīñ rahne do

aur mile gā bhī is taur ki pachhtāoge

is ghaḌī ai dil-e-āvāra kahāñ jāoge

aur kuchh der Thahar jaao ki phir nashtar-e-sub.h

zaḳhm kī tarah har ik aañkh ko bedār kare

aur har kushta-e-vāmāñdgī-e-āḳhir-e-shab

bhuul kar sā.at-e-darmāndagī-e-āḳhir-e-shab

jaan pahchān mulāqāt pe isrār kare

aur kuchh der mein luT jaega har baam pe chand

aks kho jaenge aaine taras jaenge

arsh ke dida-e-namnak se bari-bari

sab sitare sar-e-KHashak baras jaenge

aas ke mare thake haare shabistanon mein

apni tanhai sameTega, bichhaega koi

bewafai ki ghaDi, tark-e-madaraat ka waqt

is ghaDi apne siwa yaad na aaega koi

tark-e-duniya ka saman KHatm-e-mulaqat ka waqt

is ghaDi ai dil-e-awara kahan jaoge

is ghaDi koi kasi ka bhi nahin rahne do

koi is waqt mile ga hi nahin rahne do

aur mile ga bhi is taur ki pachhtaoge

is ghaDi ai dil-e-awara kahan jaoge

aur kuchh der Thahar jao ki phir nashtar-e-subh

zaKHm ki tarah har ek aankh ko bedar kare

aur har kushta-e-wamandgi-e-aKHir-e-shab

bhul kar saat-e-darmandagi-e-aKHir-e-shab

jaan pahchan mulaqat pe israr kare