kahani

maiñ ne ek kahānī sochī hai

maiñ use kabhī nahīñ likhūñgā

likhī huī kahāniyāñ paḌh kar

log bahut sī bāteñ farz kar lete haiñ

aur farzī kahāniyāñ likhnī shurūa kar dete haiñ

maiñ ne ye kahānī us se pahle kisī se nahīñ sunī

kahīñ paḌhī nahīñ aur farz bhī nahīñ kī

us ke kirdār kahānī shurūa hone se pahle

yā shāyad ba.ad meñ mar chuke haiñ

vo ek dūsre se kabhī nahīñ mile

yā shāyad hamesha saath rahe haiñ

maiñ un ke baare meñ yaqīn se kuchh nahīñ kah saktā

ġhair-farzī kahāniyoñ ke baare meñ

koī bhī yaqīn se kuchh nahīñ kah saktā

un meñ sab kuchh ḳhudā kī tarah ġhair-yaqīnī

maut kī tarah achānak

aur kabhī kabhī mohabbat kī tarah ḳhūb-sūrat aur ġhair-mutavaqqe hotā hai

us kahānī kī kahānī yuuñ shurūa

magar aisī kahāniyāñ kisī ko sunā.ī nahīñ jātīñ

varna log ḳhud ko un kā kirdār samajhne lagte haiñ

yā shāyad aisā hotā bhī hai

ye kahānī mere paas dushman kī kamzoriyoñ ke raaz

aur taash ke khel meñ turup ke pattoñ kī tarah hai

maiñ ise kabhī nahīñ likhūñgā

ise kisī ko nahīñ sunā.ūñgā

is ke kirdāroñ aur ḳhud ko bhī nahīñ

apne dostoñ aur us laḌkī ko bhī nahīñ

jis ke liye maiñ ne ek kahānī sochī hai

main ne ek kahani sochi hai

main use kabhi nahin likhunga

likhi hui kahaniyan paDh kar

log bahut si baaten farz kar lete hain

aur farzi kahaniyan likhni shurua kar dete hain

main ne ye kahani us se pahle kisi se nahin suni

kahin paDhi nahin aur farz bhi nahin ki

us ke kirdar kahani shurua hone se pahle

ya shayad baad mein mar chuke hain

wo ek dusre se kabhi nahin mile

ya shayad hamesha sath rahe hain

main un ke bare mein yaqin se kuchh nahin kah sakta

ghair-farzi kahaniyon ke bare mein

koi bhi yaqin se kuchh nahin kah sakta

un mein sab kuchh KHuda ki tarah ghair-yaqini

maut ki tarah achanak

aur kabhi kabhi mohabbat ki tarah KHub-surat aur ghair-mutawaqqe hota hai

us kahani ki kahani yun shurua

magar aisi kahaniyan kisi ko sunai nahin jatin

warna log KHud ko un ka kirdar samajhne lagte hain

ya shayad aisa hota bhi hai

ye kahani mere pas dushman ki kamzoriyon ke raaz

aur tash ke khel mein turup ke patton ki tarah hai

main ise kabhi nahin likhunga

ise kisi ko nahin sunaunga

is ke kirdaron aur KHud ko bhi nahin

apne doston aur us laDki ko bhi nahin

jis ke liye main ne ek kahani sochi hai