kahaniyan

yahāñ Thiik is jagah

jahāñ ek chaTān ek gahrī khaa.ī par jhukī huī hai

yahāñ ek chhitnār daraḳht thā

vo parinde yahāñ aate the

jin ke baare meñ logoñ meñ

ajiib ajiib kahāniyāñ mash.hūr haiñ

is chaTān ke pahlū meñ

ek ātish-kada hai

jis meñ har vaqt aag raushan rahtī hai

jis se us ke chāroñ or baiThe logoñ ke chehre

is qadar raushan ho jaate haiñ

ki is chhitnār daraḳht par baiThe parinde

ḳhauf-zada ho jaate haiñ

lekin ab yahāñ koī chhitnār daraḳht nahīñ

ātish-kada sar ho gayā

aur us aag se raushan chehre bhī

bujh ga.e

ab sirf khaa.ī kī taraf jhukī chaTān baaqī rah ga.ī hai

yā vo ajīb-o-ġharīb kahāniyāñ

jo khaa.ī aur jhukī chaTān ke gird chakkar lagā lagā kar

ab burī tarah uktā chukī haiñ

yahan Thik is jagah

jahan ek chaTan ek gahri khai par jhuki hui hai

yahan ek chhitnar daraKHt tha

wo parinde yahan aate the

jin ke bare mein logon mein

ajib ajib kahaniyan mashhur hain

is chaTan ke pahlu mein

ek aatish-kada hai

jis mein har waqt aag raushan rahti hai

jis se us ke chaaron or baiThe logon ke chehre

is qadar raushan ho jate hain

ki is chhitnar daraKHt par baiThe parinde

KHauf-zada ho jate hain

lekin ab yahan koi chhitnar daraKHt nahin

aatish-kada sar ho gaya

aur us aag se raushan chehre bhi

bujh gae

ab sirf khai ki taraf jhuki chaTan baqi rah gai hai

ya wo ajib-o-gharib kahaniyan

jo khai aur jhuki chaTan ke gird chakkar laga laga kar

ab buri tarah ukta chuki hain