kahin tum abad to nahin ho

kaho kaun ho tum

azal se khaḌe ho

nigāhoñ meñ hairat ke ḳheme lagā.e

ufuq ke ghane pāniyoñ kī taraf

apnā chehra uThā.e

kaho kaun ho tum batāo batāo

kahīñ tum tilism-e-samā.at se nā-āshnā to nahīñ ho

kahīñ tum vo dar to nahīñ ho

jo sadiyoñ kī dastak se khultā nahīñ

yā qadīmī shikasta sī mehrāb ho

jis meñ koī charāġh-e-rifāqat bhī jaltā nahīñ

dhund-ālūd kohna pahāḌoñ meñ

andar hī andar ko jaatā huā rāsta to nahīñ ho

vahī rañg ho

jis se rañg aur aamez hotā nahīñ

be-numū jhiil jis meñ parinda koī

apne par tak bhigotā nahīñ

kaun ho tum batāo batāo

kahīñ malba-e-vaqt par

nīstī ke andhere meñ baiThe hue

roz-e-avval se ujḌe hue

be-sahārā makīñ to nahīñ ho

kahīñ tum falak se pare

yā vara-e-zamīñ to nahīñ ho!

kaho kaun ho tum batāo batāo

kahīñ tum takallum ke asrār se

lafz ke bhed se nā-balad to nahīñ ho

kahīñ tum abad to nahīñ ho!!

kaho kaun ho tum

azal se khaDe ho

nigahon mein hairat ke KHeme lagae

ufuq ke ghane paniyon ki taraf

apna chehra uThae

kaho kaun ho tum batao batao

kahin tum tilism-e-samaat se na-ashna to nahin ho

kahin tum wo dar to nahin ho

jo sadiyon ki dastak se khulta nahin

ya qadimi shikasta si mehrab ho

jis mein koi charagh-e-rifaqat bhi jalta nahin

dhund-alud kohna pahaDon mein

andar hi andar ko jata hua rasta to nahin ho

wahi rang ho

jis se rang aur aamez hota nahin

be-numu jhil jis mein parinda koi

apne par tak bhigota nahin

kaun ho tum batao batao

kahin malba-e-waqt par

nisti ke andhere mein baiThe hue

roz-e-awwal se ujDe hue

be-sahaara makin to nahin ho

kahin tum falak se pare

ya wara-e-zamin to nahin ho!

kaho kaun ho tum batao batao

kahin tum takallum ke asrar se

lafz ke bhed se na-balad to nahin ho

kahin tum abad to nahin ho!!