kahkashan

zamīñ se to ye baat hai duur kī

magar kahkashāñ hai saḌak nuur kī

kahīñ saf-ba-saf rañg kī botaleñ

jalā.ī haiñ yā charḳh ye mash.aleñ

kareñ ġhaur to aql so jā.egī

nazar itne tāroñ meñ kho jā.egī

ye raste meñ sho.ale bichhā.e ga.e

ki bijlī ke TukḌe uḌaa.e ga.e

idhar se udhar tak hai dariyā-e-nūr

ki ā.īna ho gayā chuur chuur

zamīñ par kahāñ is qadar rañg-o-rūp

ye shāyad farishtoñ kī hai dauḌ dhuup

nazar aa rahā hai ye tāroñ kā baaġh

farishtoñ ne raushan kiye haiñ charāġh

vo bharpūr hai raushnī kā samāñ

ki jaise pise chāñd sūraj yahāñ

samāñ dekh kar tum kahāñ kho ga.e

'chaman' jī tum aa kar yahāñ so ga.e

zamin se to ye baat hai dur ki

magar kahkashan hai saDak nur ki

kahin saf-ba-saf rang ki botalen

jalai hain ya charKH ye mashalen

karen ghaur to aql so jaegi

nazar itne taron mein kho jaegi

ye raste mein shoale bichhae gae

ki bijli ke TukDe uDae gae

idhar se udhar tak hai dariya-e-nur

ki aaina ho gaya chur chur

zamin par kahan is qadar rang-o-rup

ye shayad farishton ki hai dauD dhup

nazar aa raha hai ye taron ka bagh

farishton ne raushan kiye hain charagh

wo bharpur hai raushni ka saman

ki jaise pise chand suraj yahan

saman dekh kar tum kahan kho gae

'chaman' ji tum aa kar yahan so gae