kaif se KHumar tak

vo hasīn thī mah-e-jabīn thī

be-gumān thī be-yaqīn thī

zindagī kī naram naram āhaTeñ

be-sabab yūñhī muskurāhaTeñ

uñgliyoñ meñ baal ko lapeTnā

dāman-e-ḳhayāl ko lapeTnā

har ghaḌī vahī milne vāliyāñ

be-ḳhayāliyāñ ḳhush-ḳhayāliyāñ

narm uljhaneñ kam-sinī ke ḳhvāb

añg añg meñ chheḌā inqalāb

muñh par oḌhnī jī kabhī nahīñ

maiñ to aap se boltī nahīñ

aur phir hayā zindagī kī maar

ma.arifat kā bojh jabr-o-iḳhtiyār

ek jaan aur saiñkaḌoñ vabāl

jism kī dukhan ruuh kā ḳhayāl

zindagī baḌhī raushnī liye

raushnī baḌhī tīrgī liye

inkisār meñ ik ġhurūr sā

kuchh ḳhumār sā kuchh surūr sā

dā.ere yahāñ dā.ere vahāñ

raqs meñ nazar raqs meñ jahāñ

guftugū meñ bal ḳhāmushī meñ loch

raat karvaTeñ karvaToñ meñ soch

dil bujhā bujhā tishnagī kī aañch

ajnabī thakan zindagī kī aañch

us ke kaam aa.eñ us kā dukh baTā.eñ

us ko chheḌ deñ aur muskurā.eñ

us kī aañkh meñ kitnā dard hai

rañg zard hai ruuh zard hai

vo udaas hai kyuuñ udaas hai

us kī zindagī kis ke paas hai

ye gunāh kyuuñ bhuul kyuuñ nahīñ

baaġh meñ tamām phuul kyuuñ nahīñ

wo hasin thi mah-e-jabin thi

be-guman thi be-yaqin thi

zindagi ki naram naram aahaTen

be-sabab yunhi muskurahaTen

ungliyon mein baal ko lapeTna

daman-e-KHayal ko lapeTna

har ghaDi wahi milne waliyan

be-KHayaliyan KHush-KHayaliyan

narm uljhanen kam-sini ke KHwab

ang ang mein chheDa inqalab

munh par oDhni ji kabhi nahin

main to aap se bolti nahin

aur phir haya zindagi ki mar

marifat ka bojh jabr-o-iKHtiyar

ek jaan aur sainkaDon wabaal

jism ki dukhan ruh ka KHayal

zindagi baDhi raushni liye

raushni baDhi tirgi liye

inkisar mein ek ghurur sa

kuchh KHumar sa kuchh surur sa

daere yahan daere wahan

raqs mein nazar raqs mein jahan

guftugu mein bal KHamushi mein loch

raat karwaTen karwaTon mein soch

dil bujha bujha tishnagi ki aanch

ajnabi thakan zindagi ki aanch

us ke kaam aaen us ka dukh baTaen

us ko chheD den aur muskuraen

us ki aankh mein kitna dard hai

rang zard hai ruh zard hai

wo udas hai kyun udas hai

us ki zindagi kis ke pas hai

ye gunah kyun bhul kyun nahin

bagh mein tamam phul kyun nahin