kamra

ba-zāhir tum ko lagtā hai

ki sab kuchh paas hai mere

nahīñ hamdam

maiñ sab kuchh chhoḌ aayā huuñ

usī kachche makāñ ke uuprī kamre kī dīvāroñ

se lipTī chand tasvīroñ ke rangoñ meñ

jo ab tak saañs letī haiñ

vo tahrīreñ kitābeñ aur tanhā.ī kī bāteñ sab

usī kamre ke niile carpet par

aaj bhī vaise paḌī hoñgī

maiñ jaise rakh ke aayā thā

vo cigarette kā dhuāñ vo qahqahe

vo taash ke patte

vahī shatranj ke mohre

jo bāshinde the us chhoTī sī duniyā ke

usī kamre meñ zinda haiñ

usī kamre meñ zinda the

ba-zahir tum ko lagta hai

ki sab kuchh pas hai mere

nahin hamdam

main sab kuchh chhoD aaya hun

usi kachche makan ke upri kamre ki diwaron

se lipTi chand taswiron ke rangon mein

jo ab tak sans leti hain

wo tahriren kitaben aur tanhai ki baaten sab

usi kamre ke nile carpet par

aaj bhi waise paDi hongi

main jaise rakh ke aaya tha

wo cigarette ka dhuan wo qahqahe

wo tash ke patte

wahi shatranj ke mohre

jo bashinde the us chhoTi si duniya ke

usi kamre mein zinda hain

usi kamre mein zinda the