kamzori

nasīm-e-ḳhuld be-ḳhaufī se mere ghar meñ dar aa.ī

kahā maiñ ne ki tum

kab sho.ala-e-javvāla ban jāogī ḳhāshāk-e-dil-o-jāñ ko

jalā kar ḳhaak karnā hai

badan par thartharī taarī hai dīvāreñ laraztī haiñ

vo ThanDak hai ki bāloñ kī jaḌoñ meñ ḳhuun

jamtā jā rahā hai

har kaḌī chhat kī sikuḌ kar chashm aifyūñ-nosh ke mānind

chhoTī hotī jaatī hai

vo dekhūñ vo rahī ik gurba-miskīñ chhupī kone meñ baiThī hai

ab in taktī huī āñkhoñ ke bhūre malgaje bādal

gul-o-lāla sharar barsā nahīñ paate

vo ThanDak hai ki qalb hosh yaḳh-basta huā jaatā hai tum kab

sho.ala-e-javvāla banñe vaalī ho

bolo

nasīm-e-ḳhuld bolī mire tār-e-nafas meñ yuuñ

nihāñ saffāk laalī hai lahū jaise rag nāzuk meñ poshīda mujhe

āġhosh meñ le kar nichoḌo tum to añgāre Tapakte dekh pāoge mujhe

muTThī meñ bhar kar muñh meñ rakh lo pī ke dekho vo sunahrā

tiir huuñ maiñ jo gale meñ chubh ke ban jaatā hai

añgārā tumheñ jalnā nahīñ aatā

nasim-e-KHuld be-KHaufi se mere ghar mein dar aai

kaha main ne ki tum

kab shoala-e-jawwala ban jaogi KHashak-e-dil-o-jaan ko

jala kar KHak karna hai

badan par tharthari tari hai diwaren larazti hain

wo ThanDak hai ki baalon ki jaDon mein KHun

jamta ja raha hai

har kaDi chhat ki sikuD kar chashm aifyun-nosh ke manind

chhoTi hoti jati hai

wo dekhun wo rahi ek gurba-miskin chhupi kone mein baiThi hai

ab in takti hui aankhon ke bhure malgaje baadal

gul-o-lala sharar barsa nahin pate

wo ThanDak hai ki qalb hosh yaKH-basta hua jata hai tum kab

shoala-e-jawwala banne wali ho

bolo

nasim-e-KHuld boli mere tar-e-nafas mein yun

nihan saffak lali hai lahu jaise rag nazuk mein poshida mujhe

aaghosh mein le kar nichoDo tum to angare Tapakte dekh paoge mujhe

muTThi mein bhar kar munh mein rakh lo pi ke dekho wo sunahra

tir hun main jo gale mein chubh ke ban jata hai

angara tumhein jalna nahin aata