kangan

kaash maiñ tere hasīñ haath kā kañgan hotā

tū baḌe pyaar se chaav se baḌe maan ke saath

apnī nāzuk sī kalā.ī meñ chaḌhātī mujh ko

aur betābī se furqat ke ḳhizāñ lamhoñ meñ

tū kisī soch meñ Duubī jo ghumātī mujh ko

maiñ tire haath kī ḳhushbū se mahak sā jaatā

jab kabhī mood meñ aa kar mujhe chūmā kartī

tere hoñToñ kī meñ hiddat se dahak sā jaatā

raat ko jab bhī tū nīñdoñ ke safar par jaatī

marmarīñ haath kā ik takiya banāyā kartī

maiñ tire kaan se lag kar ka.ī bāteñ kartā

terī zulfoñ ko tire gaal ko chūmā kartā

jab bhī tū band-e-qabā kholne lagtī jānāñ

apnī āñkhoñ ko tire husn se ḳhīra kartā

mujh ko betāb sā rakhtā tirī chāhat kā nasha

maiñ tirī ruuh ke gulshan meñ mahaktā rahtā

maiñ tire jism ke āñgan meñ khanaktā hotā

kuchh nahīñ to yahī be-nām sā bandhan hotā

kaash maiñ tere hasīñ haath kā kañgan hotā

kash main tere hasin hath ka kangan hota

tu baDe pyar se chaw se baDe man ke sath

apni nazuk si kalai mein chaDhati mujh ko

aur betabi se furqat ke KHizan lamhon mein

tu kisi soch mein Dubi jo ghumati mujh ko

main tere hath ki KHushbu se mahak sa jata

jab kabhi mood mein aa kar mujhe chuma karti

tere honTon ki mein hiddat se dahak sa jata

raat ko jab bhi tu nindon ke safar par jati

marmarin hath ka ek takiya banaya karti

main tere kan se lag kar kai baaten karta

teri zulfon ko tere gal ko chuma karta

jab bhi tu band-e-qaba kholne lagti jaanan

apni aankhon ko tere husn se KHira karta

mujh ko betab sa rakhta teri chahat ka nasha

main teri ruh ke gulshan mein mahakta rahta

main tere jism ke aangan mein khanakta hota

kuchh nahin to yahi be-nam sa bandhan hota

kash main tere hasin hath ka kangan hota