kanhaiya

maiñ sadqe tire haq ke pyāre kanhaiyā

zamīñ par ḳhudā ke utāre kanhaiyā

nahīñ ek gokul pe mauqūf jalve

tire har kahīñ haiñ nazāre kanhaiyā

maza to yahī hai tirī ma.arifat kā

ki har qaum samjhe hamāre kanhaiyā

vahī to haiñ bas zinda-dār-e-mohabbat

tire ishq ke jo haiñ maare kanhaiyā

jafā-o-sitam ke añdheroñ meñ mil kar

bane ḳhalq meñ chāñd taare kanhaiyā

milī hai unheñ ko to rāh-e-haqīqat

chale haiñ jo tere sahāre kanhaiyā

ajab kyā mazālim kī tārīkiyoñ meñ

zamāna tujhe phir pukāre kanhaiyā

jo haiñ aaj bhī haq-parastī ke mahram

vo zinda haiñ tere sahāre kanhaiyā

na dil 'kans' hai aur na vo daur 'afkar'

magar rah ga.e haq ke pyāre kanhaiyā

main sadqe tere haq ke pyare kanhaiya

zamin par KHuda ke utare kanhaiya

nahin ek gokul pe mauquf jalwe

tere har kahin hain nazare kanhaiya

maza to yahi hai teri marifat ka

ki har qaum samjhe hamare kanhaiya

wahi to hain bas zinda-dar-e-mohabbat

tere ishq ke jo hain mare kanhaiya

jafa-o-sitam ke andheron mein mil kar

bane KHalq mein chand tare kanhaiya

mili hai unhen ko to rah-e-haqiqat

chale hain jo tere sahaare kanhaiya

ajab kya mazalim ki tarikiyon mein

zamana tujhe phir pukare kanhaiya

jo hain aaj bhi haq-parasti ke mahram

wo zinda hain tere sahaare kanhaiya

na dil 'kans' hai aur na wo daur 'afkar'

magar rah gae haq ke pyare kanhaiya