kanhayya

maiñ sadqe tire haq ke pyāre kanhayyā

zamīñ par ḳhudā ke utāre kanhayyā

nahīñ ek gokul pe mauqūf jalve

tire har kahīñ haiñ nazāre kanhayyā

maza to yahī hai tirī ma.arifat kā

ki har qaum samjhe hamāre kanhayyā

vahī to haiñ bas zinda dār-e-mohabbat

tire ishq ke jo haiñ maare kanhayyā

jafā-o-sitam ke añdheroñ meñ pal kar

bane ḳhalq meñ chāñd taare kanhayyā

milī hai unhīñ ko to rāh-e-haqīqat

chale haiñ jo tere sahāre kanhayyā

ajab kyā mazālim kī tārīkiyoñ meñ

zamāna tujhe phir pukāre kanhayyā

jo haiñ aaj bhī haq-parastī ke mahram

vo zinda haiñ tere sahāre kanhayyā

na vo kans hai aur na vo daur 'afqar'

magar rah ga.e haq ke pyāre kanhayyā

main sadqe tere haq ke pyare kanhayya

zamin par KHuda ke utare kanhayya

nahin ek gokul pe mauquf jalwe

tere har kahin hain nazare kanhayya

maza to yahi hai teri marifat ka

ki har qaum samjhe hamare kanhayya

wahi to hain bas zinda dar-e-mohabbat

tere ishq ke jo hain mare kanhayya

jafa-o-sitam ke andheron mein pal kar

bane KHalq mein chand tare kanhayya

mili hai unhin ko to rah-e-haqiqat

chale hain jo tere sahaare kanhayya

ajab kya mazalim ki tarikiyon mein

zamana tujhe phir pukare kanhayya

jo hain aaj bhi haq-parasti ke mahram

wo zinda hain tere sahaare kanhayya

na wo kans hai aur na wo daur 'afqar'

magar rah gae haq ke pyare kanhayya