kar gae kuch kahan

itnī muddat dil-e-āvāra kahāñ thā ki tujhe

apne hī ghar ke dar-o-bām bhulā baiThe haiñ

yaad yāroñ ne to kab harf-e-mohabbat rakkhā

ġhair bhī ta.ana o dushnām bhulā baiThe haiñ

to samajhtā thā ki ye dar-badarī kā aalam

duur desoñ kī ināyat thā so ab ḳhatm huā

tū ne jaanā thā ki āshufta-sarī kā mausam

dasht-e-ġhurbat kī vadī.at thā so ab ḳhatm huā

ab jo tū shahr-e-nigārāñ meñ qadam rakkhegā

har taraf khilte chale jā.eñge chehroñ ke gulāb

dost-ahbāb tire naam ke Takrā.eñge jaam

ġhair-aġhyār chukā.eñge raqābat ke hisāb

jab bhī gā.egī koī ġhairat-e-nāhīd ġhazal

sab ko aa.egā nazar sho.ala-e-āvāz meñ tū

jab bhī saaqī ne surāhī ko diyā izn-e-ḳhirām

bazm kī bazm pukāregī ki āġhāz meñ tū

maa.eñ rakkheñgī tire naam pe aulād kā naam

baap beToñ ke liye terī bayāzeñ leñge

jin pe qadġhan hai vo ash.ār paḌhegī ḳhilqat

aur TuuTe hue dil tujh ko salāmī deñge

log ulfat ke khilaune liye bachchoñ kī tarah

kal ke rūThe hue yāroñ ko manā lā.eñge

lafz ko bechne vaale na.e bāzāroñ meñ

ġhairat harf ko laate hue sharmā.eñge

lekin aisā nahīñ aisā nahīñ ai dil ai dil

ye tirā des ye tere dar-o-dīvār nahīñ

itne yūsuf to na the misr ke bāzār meñ bhī

jins is darja hai vāfir ki ḳharīdār nahīñ

sar kisī kā bhī dikhā.ī nahīñ detā hai yahāñ

jism hī jism haiñ dastāreñ hī dastāreñ haiñ

tū kisī qarya-e-zindāñ meñ hai shāyad ki jahāñ

tauq hī tauq haiñ dīvāreñ hī dīvāreñ haiñ

ab na tiflāñ ko ḳhabar hai kisī dīvāne kī

aur na āvāz ki ''o chaak garebāñ vāle''

na kisī haath meñ patthar na kisī haath meñ phuul

kar ga.e kuuch kahāñ kūcha-e-jānāñ vaale

itni muddat dil-e-awara kahan tha ki tujhe

apne hi ghar ke dar-o-baam bhula baiThe hain

yaad yaron ne to kab harf-e-mohabbat rakkha

ghair bhi tana o dushnam bhula baiThe hain

to samajhta tha ki ye dar-badari ka aalam

dur deson ki inayat tha so ab KHatm hua

tu ne jaana tha ki aashufta-sari ka mausam

dasht-e-ghurbat ki wadiat tha so ab KHatm hua

ab jo tu shahr-e-nigaran mein qadam rakkhega

har taraf khilte chale jaenge chehron ke gulab

dost-ahbab tere nam ke Takraenge jam

ghair-aghyar chukaenge raqabat ke hisab

jab bhi gaegi koi ghairat-e-nahid ghazal

sab ko aaega nazar shoala-e-awaz mein tu

jab bhi saqi ne surahi ko diya izn-e-KHiram

bazm ki bazm pukaregi ki aaghaz mein tu

maen rakkhengi tere nam pe aulad ka nam

bap beTon ke liye teri bayazen lenge

jin pe qadghan hai wo ashaar paDhegi KHilqat

aur TuTe hue dil tujh ko salami denge

log ulfat ke khilaune liye bachchon ki tarah

kal ke ruThe hue yaron ko mana laenge

lafz ko bechne wale nae bazaron mein

ghairat harf ko late hue sharmaenge

lekin aisa nahin aisa nahin ai dil ai dil

ye tera des ye tere dar-o-diwar nahin

itne yusuf to na the misr ke bazar mein bhi

jins is darja hai wafir ki KHaridar nahin

sar kisi ka bhi dikhai nahin deta hai yahan

jism hi jism hain dastaren hi dastaren hain

tu kisi qarya-e-zindan mein hai shayad ki jahan

tauq hi tauq hain diwaren hi diwaren hain

ab na tiflan ko KHabar hai kisi diwane ki

aur na aawaz ki o chaak gareban wale

na kisi hath mein patthar na kisi hath mein phul

kar gae kuch kahan kucha-e-jaanan wale