karachi

dhueñ aur dhuul meñ kaalā gulāb

yahāñ par sātvāñ dar ism se mahrūm

bose kī vilādat ke liye sūkhe hue hoñToñ kī shikneñ

barf kī qāsheñ

zamīñ kā bāñjh-pan apnā hisār

shunīda nā-shunīda rāstoñ kī garm rāteñ

jism ke bāloñ kā uunī coat

sindh ke dariyā kī lahroñ kī ravānī

do taraf keloñ ke bāġhīche

nigāhoñ kī bikhartī ret meñ ta.amīr hote barber

sah-manzila ashjār ke pīchhe laraztā Traam kā lohā

guzartī raat kī charbī pe jamte aa.ine se din

ḳhas-o-ḳhāshāk kī bāDoñ ke pīchhe sim-zada umroñ

ke buuTe

pur-shikan choġhoñ meñ Dhalte maas be-girya

yahī gardān piile harf kī zanjīr

gamloñ meñ ugaa.e saare paude

qufl ban kar sāmne haiñ

jism ke aaTe meñ donoñ haath

din aur raat din aur raat gūñdhte haiñ

pahlī sūraj kī kiran ke saath

machheroñ ke tane rise

samundar kī jaḌī hañsulī pe girte haiñ

dhuen aur dhul mein kala gulab

yahan par satwan dar ism se mahrum

bose ki wiladat ke liye sukhe hue honTon ki shiknen

barf ki qashen

zamin ka banjh-pan apna hisar

shunida na-shunida raston ki garm raaten

jism ke baalon ka uni coat

sindh ke dariya ki lahron ki rawani

do taraf kelon ke baghiche

nigahon ki bikharti ret mein tamir hote barber

sah-manzila ashjar ke pichhe larazta Tram ka loha

guzarti raat ki charbi pe jamte aaine se din

KHas-o-KHashak ki baDon ke pichhe sim-zada umron

ke buTe

pur-shikan choghon mein Dhalte mas be-girya

yahi gardan pile harf ki zanjir

gamlon mein ugae sare paude

qufl ban kar samne hain

jism ke aaTe mein donon hath

din aur raat din aur raat gundhte hain

pahli suraj ki kiran ke sath

machheron ke tane rise

samundar ki jaDi hansuli pe girte hain