karachi ka traffic

chashm-e-bad-dūr karachi meñ traffic kā nizām

ūñT-gāḌī kī gadhā-gāḌī kī Tik-Tik kā nizām

rāhgīroñ se police vāloñ kī jhak jhak kā nizām

kitnā choukas hai ye pasmāñda mamālik kā nizām

raah roke hai police ''kār-guzārī'' dekho

kis tarah jaatī hai shāhoñ kī savārī dekho

dekho vo jaatī hai rishvat se ḳharīdī huī car

sehn-e-gulshan meñ ho jaise guzarāñ mauj-e-bahār

paak dāman pe nahīñ us ke zarā gard-o-ġhubār

chor-bāzār meñ phirtī hai ba-sad-izz-o-vaqār

kyā ho is car ke nīche jo koī aa jaa.e

be-vasīla ho to lambī sī sazā pā jaa.e

na ḳhudā kā hai ise Dar na hai insān kā Dar

na ise rakhshā chalāte hue haivān kā Dar

na police kā hai ise ḳhauf na chālān kā Dar

hai agar Dar to usī mard-e-musalmān kā Dar

ūñT-gāḌī pe sajā.e jo julūs aatā hai

jis tarah muttahid aqvām meñ ruus aatā hai

ūñT-gāḌī jo saḌak par nazar aa jaatī hai

''cadillac'' car ise dekh ke sharmātī hai

''buick'' meñ huuk sī uThtī hai to bal khātī hai

''mercury'' Thahartī hai ''dodge'' bhī katrātī hai

mujh ko tujh se jo hai ulfat vo hai one-way saaqī

ham bhī haiñ tere hī allāh ke bande saaqī

bus chalī jā rahī hai umr-e-gurezāñ kī tarah

Thas ke baiThe haiñ musāfir saf-e-mizhgāñ kī tarah

mubtalā pech meñ haiñ zulf-e-pareshāñ kī tarah

dar pe laTke haiñ bashar ḳhār-e-muġhīlāñ kī tarah

race kartī haiñ baseñ shahar ke bāzāroñ meñ

haiñ ye sab qābiz-e-arvāh ke auzāroñ meñ

rickshaw jaatī hai dikhātī huī josh aur ḳharosh

aur vo naġhma jise sun ke ho jheñgur ḳhāmosh

kaisī bal khātī huī jaatī hai tūfān-ba-dosh

baiTh kar jis meñ savārī ke bhī uḌ jā.eñge hosh

jab gaḌhā aatā hai raste meñ uchhal jaatī hai

apnī chañdiyā ko savārī jo hai sahlātī hai

ek hafta bhī traffic kā manā.egī police

jāda-paimā.ī ke ādāb sikhā.egī police

ik gadhā shahar meñ se chun ke jo lā.egī police

us ko har tarah se insān banā.egī police

hafta bhar ba.ad vo ho jā.egā pahlā sā gadhā

laakh sar maarā magar kuchh nahīñ sīkhā na paḌā

kitnā achchhā hai karachi meñ traffic kā nizām

na to public na police vāloñ ke muñh meñ hai lagām

roz chaurāhoñ pe kartī hai police mashq-e-kalām

jāda-paimāoñ kā jaarī hai vahī tarz-e-ḳhirām

jā-ba-jā board pe likkhā hai ki ḳhāmosh raho

''fikr-e-fardā na karo mahv-e-ġham-e-dosh raho''

chashm-e-bad-dur karachi mein traffic ka nizam

unT-gaDi ki gadha-gaDi ki Tik-Tik ka nizam

rahgiron se police walon ki jhak jhak ka nizam

kitna choukas hai ye pasmanda mamalik ka nizam

rah roke hai police kar-guzari dekho

kis tarah jati hai shahon ki sawari dekho

dekho wo jati hai rishwat se KHaridi hui car

sehn-e-gulshan mein ho jaise guzaran mauj-e-bahaar

pak daman pe nahin us ke zara gard-o-ghubar

chor-bazar mein phirti hai ba-sad-izz-o-waqar

kya ho is car ke niche jo koi aa jae

be-wasila ho to lambi si saza pa jae

na KHuda ka hai ise Dar na hai insan ka Dar

na ise rakhsha chalate hue haiwan ka Dar

na police ka hai ise KHauf na chaalan ka Dar

hai agar Dar to usi mard-e-musalman ka Dar

unT-gaDi pe sajae jo julus aata hai

jis tarah muttahid aqwam mein rus aata hai

unT-gaDi jo saDak par nazar aa jati hai

cadillac car ise dekh ke sharmati hai

buick mein huk si uThti hai to bal khati hai

mercury Thaharti hai dodge bhi katraati hai

mujh ko tujh se jo hai ulfat wo hai one-way saqi

hum bhi hain tere hi allah ke bande saqi

bus chali ja rahi hai umr-e-gurezan ki tarah

Thas ke baiThe hain musafir saf-e-mizhgan ki tarah

mubtala pech mein hain zulf-e-pareshan ki tarah

dar pe laTke hain bashar KHar-e-mughilan ki tarah

race karti hain basen shahar ke bazaron mein

hain ye sab qabiz-e-arwah ke auzaron mein

rickshaw jati hai dikhati hui josh aur KHarosh

aur wo naghma jise sun ke ho jhengur KHamosh

kaisi bal khati hui jati hai tufan-ba-dosh

baiTh kar jis mein sawari ke bhi uD jaenge hosh

jab gaDha aata hai raste mein uchhal jati hai

apni chandiya ko sawari jo hai sahlati hai

ek hafta bhi traffic ka manaegi police

jada-paimai ke aadab sikhaegi police

ek gadha shahar mein se chun ke jo laegi police

us ko har tarah se insan banaegi police

hafta bhar baad wo ho jaega pahla sa gadha

lakh sar mara magar kuchh nahin sikha na paDa

kitna achchha hai karachi mein traffic ka nizam

na to public na police walon ke munh mein hai lagam

roz chaurahon pe karti hai police mashq-e-kalam

jada-paimaon ka jari hai wahi tarz-e-KHiram

ja-ba-ja board pe likkha hai ki KHamosh raho

fikr-e-farda na karo mahw-e-gham-e-dosh raho