karbala

laboñ pe alfāz haiñ ki pyāsoñ kā qāfila hai

namī hai ye yā furāt ā.ankhoñ se bah rahī hai

hayāt ā.ankhoñ se bah rahī hai

sipāh-e-fisq-o-fujūr yalġhār kar rahī hai

diloñ ko mismār kar rahī hai

lahū lahū haiñ hamārī socheñ

barahna-sar hai hayā tamannā.eñ baal nocheñ

vafā ke baazū kaTe hue haiñ

halākatoñ ke ġhubār se zindagī ke maidāñ paTe hue haiñ

dhuāñ har ik ḳhema-e-sadā se nikal rahā hai

har ek andar se jal rahā hai

riyā ke nezoñ pe aaj sachchā.iyoñ ke sar haiñ

yazīdiyat ke usuul apne uruuj par haiñ

baḌī hī zālim hai haq-pasandī ko chain lene na de ye duniyā

hameñ to kuufa lage ye duniyā

qadam qadam āzmā.ishoñ kī fazā milī hai

hameñ to har daur meñ na.ī karbalā milī hai

labon pe alfaz hain ki pyason ka qafila hai

nami hai ye ya furaat aaankhon se bah rahi hai

hayat aaankhon se bah rahi hai

sipah-e-fisq-o-fujur yalghaar kar rahi hai

dilon ko mismar kar rahi hai

lahu lahu hain hamari sochen

barahna-sar hai haya tamannaen baal nochen

wafa ke bazu kaTe hue hain

halakaton ke ghubar se zindagi ke maidan paTe hue hain

dhuan har ek KHema-e-sada se nikal raha hai

har ek andar se jal raha hai

riya ke nezon pe aaj sachchaiyon ke sar hain

yazidiyat ke usul apne uruj par hain

baDi hi zalim hai haq-pasandi ko chain lene na de ye duniya

hamein to kufa lage ye duniya

qadam qadam aazmaishon ki faza mili hai

hamein to har daur mein nai karbala mili hai