karl marx

marx ke ilm o fatānat kā nahīñ koī javāb

kaun us ke dark se hotā nahīñ hai faiz-yāb

us kī dānā.ī kā hāsil nāḳhūn-e-uqda-kushā

tābnāki-e-zamīr-o-zīrakī kā āftāb

chāhne vāloñ kā us kī zikr hī kyā kījiye

us ke dushman bhī sirhāne rakhte haiñ us kī kitāb

māddī tārīḳh-e-ālam jis kī tālīf-e-azīm

taas kaipiTāl hai yā ziist kā lubb-e-lubāb

paḌh ke jis ke ho ga.iiñ hushyār aqvām-e-ġhulām

ishtirākī falsafa kā khul gayā har dil meñ baab

kitne dozaḳh us ke ik manshūr se jannat bane

kitne sahrāoñ ko jis ne kar diyā shahr-e-gulāb

marx ne science o insāñ ko kiyā hai ham-kanār

zehn ko baḳhshā shu.ūr-e-zindagānī kā nisāb

us kī bīnish us kī vajdānī-nigāh-e-haq-shanās

kar ga.ī jo chehra-e-iflās-e-zar ko be-naqāb

'ġhasab-e-ujrat' ko diyā 'sarmāyā' kā jis ne laqab

be-hisāb us kī basīrat us kī mantiq lā-javāb

āftāb taaza kī us ne bashārat dī hameñ

us kī har peshan-goī hai barafganda naqāb

koī quvvat us kī sadd-e-rāh ban saktī nahīñ

vaqt kā farmān jab aatā hai ban kar inqilāb

ahl-e-dānish kā rajaz aur sīna-e-dahqāñ kī Dhaal

lashkar mazdūr ke haiñ ham-safīr o ham-rikāb

kāTtī hai sehr-e-sultānī ko jab muusā kī zarb

satvat-e-firaun ho jaatī hai az ḳhud ġharq-e-āb

aaj kī fir.auniyat bhī kuchh isī andāz se

rafta rafta hotī jā.egī shikār-e-inqilāb

laḌ rahā hai jañg āḳhir kīsa-e-sarmāya-dār

jauhrī hathiyār se kartā nahīñ jo ijtināb

apne mustaqbil se tāġhūtī tamaddun ko hai yaas

dīdanī hai dushman-e-insāniyat kā iztirāb

hazrat-e-iqbāl kā iblīs-e-kochak ḳhauf se

larza-bar-andām yuuñ shaitāñ se kartā hai ḳhitāb

panDit o mullā o rāhib be-zarar Thahre magar

TūTne vaalā hai tujh par ik yahūdī kā itaab

vo kalīm-e-be-tajallī vo masīh-e-be-salīb

niist paiġhambar o lekin dar baġhal dārad kitāb

marx ke ilm o fatanat ka nahin koi jawab

kaun us ke dark se hota nahin hai faiz-yab

us ki danai ka hasil naKHun-e-uqda-kusha

tabnaki-e-zamir-o-ziraki ka aaftab

chahne walon ka us ki zikr hi kya kijiye

us ke dushman bhi sirhane rakhte hain us ki kitab

maddi tariKH-e-alam jis ki talif-e-azim

tas kaipiTal hai ya zist ka lubb-e-lubab

paDh ke jis ke ho gain hushyar aqwam-e-ghulam

ishtiraki falsafa ka khul gaya har dil mein bab

kitne dozaKH us ke ek manshur se jannat bane

kitne sahraon ko jis ne kar diya shahr-e-gulab

marx ne science o insan ko kiya hai ham-kanar

zehn ko baKHsha shuur-e-zindagani ka nisab

us ki binish us ki wajdani-nigah-e-haq-shanas

kar gai jo chehra-e-iflas-e-zar ko be-naqab

'ghasab-e-ujrat' ko diya 'sarmaya' ka jis ne laqab

be-hisab us ki basirat us ki mantiq la-jawab

aaftab taza ki us ne bashaarat di hamein

us ki har peshan-goi hai barafganda naqab

koi quwwat us ki sadd-e-rah ban sakti nahin

waqt ka farman jab aata hai ban kar inqilab

ahl-e-danish ka rajaz aur sina-e-dahqan ki Dhaal

lashkar mazdur ke hain ham-safir o ham-rikab

kaTti hai sehr-e-sultani ko jab musa ki zarb

satwat-e-firaun ho jati hai az KHud gharq-e-ab

aaj ki firauniyat bhi kuchh isi andaz se

rafta rafta hoti jaegi shikar-e-inqilab

laD raha hai jang aaKHir kisa-e-sarmaya-dar

jauhri hathiyar se karta nahin jo ijtinab

apne mustaqbil se taghuti tamaddun ko hai yas

didani hai dushman-e-insaniyat ka iztirab

hazrat-e-iqbaal ka iblis-e-kochak KHauf se

larza-bar-andam yun shaitan se karta hai KHitab

panDit o mulla o rahib be-zarar Thahre magar

TuTne wala hai tujh par ek yahudi ka itab

wo kalim-e-be-tajalli wo masih-e-be-salib

nist paighambar o lekin dar baghal darad kitab