kashmakash

sochte sochte phir mujh ko ḳhayāl aatā hai

vo mire rañj-o-masā.ib kā mudāvā to na thī

rañg-afshāñ thī mire dil kī ḳhalāoñ meñ magar

ek aurat thī ilāj-e-ġham duniyā to na thī

mere idrāk ke nāsūr to riste rahte

merī ho kar bhī vo mere liye kyā kar letī

hasrat-o-yās ke gambhīr añdhere meñ bhalā

ek nāzuk sī kiran saath kahāñ tak detī

us ko rahnā thā zar-o-sīm ke aivānoñ meñ

rah bhī jaatī vo mire saath to rahtī kab tak

ek maġhrūr sahūkār kī pyārī beTī

bhuuk aur pyaas kī taklīf ko sahtī kab tak

ek shā.er kī tamannāoñ ko dhokā de kar

us ne toḌī hai agar pyaar bhare giit kī lai

is pe afsos hai kyuuñ is pe ta.ajjub kaisā

ye mohabbat bhī to ehsās kā ik dhokā hai

phir bhī anjāne meñ jab shahr kī rāhoñ meñ kahīñ

dekh letā huuñ maiñ doshīza jamāloñ ke hujūm

ruuh par phailne lagtā hai udāsī kā ġhubār

zehn meñ reñgne lagte haiñ ḳhayāloñ ke hujūm

sochte sochte phir mujh ko ḳhayāl aatā hai

vo mire rañj-o-masā.ib kā mudāvā to na thī

rañg-afshāñ thī mire dil kī ḳhalāoñ meñ magar

ek aurat thī ilāj-e-ġham-e-duniyā to na thī

sochte sochte phir mujh ko KHayal aata hai

wo mere ranj-o-masaib ka mudawa to na thi

rang-afshan thi mere dil ki KHalaon mein magar

ek aurat thi ilaj-e-gham duniya to na thi

mere idrak ke nasur to riste rahte

meri ho kar bhi wo mere liye kya kar leti

hasrat-o-yas ke gambhir andhere mein bhala

ek nazuk si kiran sath kahan tak deti

us ko rahna tha zar-o-sim ke aiwanon mein

rah bhi jati wo mere sath to rahti kab tak

ek maghrur sahukar ki pyari beTi

bhuk aur pyas ki taklif ko sahti kab tak

ek shaer ki tamannaon ko dhoka de kar

us ne toDi hai agar pyar bhare git ki lai

is pe afsos hai kyun is pe tajjub kaisa

ye mohabbat bhi to ehsas ka ek dhoka hai

phir bhi anjaane mein jab shahr ki rahon mein kahin

dekh leta hun main doshiza jamalon ke hujum

ruh par phailne lagta hai udasi ka ghubar

zehn mein rengne lagte hain KHayalon ke hujum

sochte sochte phir mujh ko KHayal aata hai

wo mere ranj-o-masaib ka mudawa to na thi

rang-afshan thi mere dil ki KHalaon mein magar

ek aurat thi ilaj-e-gham-e-duniya to na thi