kashmir

yahāñ ḳhvāb-e-sukūñ-parvar meñ bhī bedāriyāñ dekhīñ

yahāñ har hoshiyārī meñ na.ī sarshāriyāñ dekhīñ

yahāñ kī ghāTiyoñ meñ husn ke chashme ubalte haiñ

yahāñ har chiiz par jazbāt-e-insānī machalte haiñ

pareshāñ manzarī meñ bhī yahāñ fitrat sañvartī hai

ḳhamoshī meñ bhī ik mauj-tarannum raqs kartī hai

vo shālīmār kī rañgīniyoñ meñ husn kā jaadū

vo duniyā-e-shabāb-o-sher vo gulzār-e-rañg-o-bū

nashāt-e-rūh-afzā kī fazāoñ meñ vo rañgīnī

vo favvāroñ kī naġhma-sāziyoñ meñ kaif-e-ḳhud-bīnī

vo joban chashma-e-shāhī kī doshīza bahāroñ kā

ki gul phūle haiñ yā jhurmuT utar aayā sitāroñ kā

vo ūñche parbat aur un par vo bal khātī huī rāheñ

vo har vādī-e-tamannā-ḳhez phailā.ī huī bāheñ

sanobar kī ghanī shāḳhoñ kā vo kaif-āfrīñ saaya

ki jis meñ iztirāb-e-zindagī ne bhī sukūñ paayā

jidhar dekhā udhar ik chashma-e-barfāb hī dekhā

nigāhoñ ne mirī ik manzar-e-sīmāb hī dekhā

sar-e-maġhrib vo apnī sair paanī par shikāroñ meñ

ḳhizāñ kā vahm bhī ik paap hai aisī bahāroñ meñ

yahāñ paanī ke dhāre par charāġh-e-zīst jalte haiñ

yahāñ maujoñ kī godī meñ ka.ī mallāh palte haiñ

kināroñ ke vo barqī qumqumoñ kā aks paanī meñ

ki jaise bijliyāñ taḌpeñ taḳhayyul kī ravānī meñ

jilau-ḳhāne haiñ fitrat ke ki ye rañgīñ fazā.eñ haiñ

ye maujeñ kausar-o-tasnīm kī haiñ yā havā.eñ haiñ

nigāheñ jis taraf uThtī haiñ sheristān hai manzar

latāfat se bharā mausīqiyoñ kī jaan hai manzar

maiñ hairāñ huuñ ki is ḳhitte ko kyuuñ kar sar-zamīñ kahiye

sadāqat kā taqāzā hai ki firdaus-e-barīñ kahiye

yahan KHwab-e-sukun-parwar mein bhi bedariyan dekhin

yahan har hoshiyari mein nai sarshaariyan dekhin

yahan ki ghaTiyon mein husn ke chashme ubalte hain

yahan har chiz par jazbaat-e-insani machalte hain

pareshan manzari mein bhi yahan fitrat sanwarti hai

KHamoshi mein bhi ek mauj-tarannum raqs karti hai

wo shaalimar ki ranginiyon mein husn ka jadu

wo duniya-e-shabab-o-sher wo gulzar-e-rang-o-bu

nashat-e-ruh-afza ki fazaon mein wo rangini

wo fawwaron ki naghma-saziyon mein kaif-e-KHud-bini

wo joban chashma-e-shahi ki doshiza bahaaron ka

ki gul phule hain ya jhurmuT utar aaya sitaron ka

wo unche parbat aur un par wo bal khati hui rahen

wo har wadi-e-tamanna-KHez phailai hui bahen

sanobar ki ghani shaKHon ka wo kaif-afrin saya

ki jis mein iztirab-e-zindagi ne bhi sukun paya

jidhar dekha udhar ek chashma-e-barfab hi dekha

nigahon ne meri ek manzar-e-simab hi dekha

sar-e-maghrib wo apni sair pani par shikaron mein

KHizan ka wahm bhi ek pap hai aisi bahaaron mein

yahan pani ke dhaare par charagh-e-zist jalte hain

yahan maujon ki godi mein kai mallah palte hain

kinaron ke wo barqi qumqumon ka aks pani mein

ki jaise bijliyan taDpen taKHayyul ki rawani mein

jilau-KHane hain fitrat ke ki ye rangin fazaen hain

ye maujen kausar-o-tasnim ki hain ya hawaen hain

nigahen jis taraf uThti hain sheristan hai manzar

latafat se bhara mausiqiyon ki jaan hai manzar

main hairan hun ki is KHitte ko kyun kar sar-zamin kahiye

sadaqat ka taqaza hai ki firdaus-e-barin kahiye