kasrat-e-aulad

suniye ik nā-āqibat-andesh kī fariyād hai

kah rahā hai vo mujhe apnī javānī yaad hai

maiñ jise kahtā thā ghar vo aaj tifl-ābād hai

merī tanhā jaan hai aur kasrat-e-aulād hai

''ai ġham-e-dil kyā karūñ, ai vahshat-e-dil kyā karūñ''

vo bhī kyā din the ki jab ye muflisī chhā.ī na thī

''āshiqī qaid-e-sharī.at meñ'' abhī aa.ī na thī

kis qadar the mutma.in go jeb meñ paa.ī na thī

kasrat-e-aulād ke baa.is ye rusvā.ī na thī

''ai ġham-e-dil kyā karūñ, ai vahshat-e-dil kyā karūñ''

kyā ḳhatā merī ki jo bachcha huā juḌvāñ huā

aur ma.a ham-zād aajiz hī ke ghar mehmāñ huā

mere ghar aayā to goyā dāḳhil-e-zindāñ huā

mulk meñ ġhalle kī qillat kā nayā unvāñ huā

''ai ġham-e-dil kyā karūñ, ai vahshat-e-dil kyā karūñ''

ho ga.e haiñ ek darjan aaj tak laḳht-e-jigar

ek in meñ referē gyārah khilāḌī haiñ magar

is khilāḌī team meñ fōtbāl hai in kā pidar

us ko dauḌāte haiñ ye bachche idhar gaahe udhar

''ai ġham-e-dil kyā karūñ, ai vahshat-e-dil kyā karūñ''

jā ke pahle ke liye moTī sifārish lā.ūñgā

mauqa.a-be-mauqa.a a.izza ko bahut dauḌā.ūñgā

apne saare dostoñ kī jaan ko aa jā.ūñgā

aur kisī daftar meñ us ko naukrī dilvā.ūñgā

''ai ġham-e-dil kyā karūñ, ai vahshat-e-dil kyā karūñ''

dūsrā bīmār hai lā.ūñgā maiñ us kī davā

DhūñDhtā huuñ tīsare ke dāḳhle ko madrasa

jā ke chauthe ne jo ham-sā.e se jhagḌā kar liyā

is ko nekī de ḳhudā se kar rahā huuñ ye duā

''ai ġham-e-dil kyā karūñ, ai vahshat-e-dil kyā karūñ''

pāñchvāñ hai aur chhaTā hai aur patañgeñ aur Dor

sātvāñ hai, āTHvāñ hai aur navāñ karte haiñ zor

koī bachcha chīḳhtā hai aur koī kartā hai shor

kyūñki ye ik dūsre ko chheḌ kar karte haiñ bor

''ai ġham-e-dil kyā karūñ, ai vahshat-e-dil kyā karūñ''

haiñ jo dasvīñ, gyārahvīñ, donoñ haiñ kandhoñ par savār

ye dilā do vo dilā do kah rahe haiñ baar baar

bārahvāñ bachcha jo hai vo kar rahā hai maañ ko ḳhvār

raat bhar rotā hai us kī god meñ vo nā-bakār

''ai ġham-e-dil kyā karūñ, ai vahshat-e-dil kyā karūñ''

ghar meñ motor bhī barā.e-bār-bardārī nahīñ

saath le jaane meñ bachchoñ ke ba-juz-ḳhvārī nahīñ

ek bachcha god meñ le luuñ ki vo bhārī nahīñ

vo magar darjan haiñ maiñ insān huuñ laarī nahīñ

''ai ġham-e-dil kyā karūñ, ai vahshat-e-dil kyā karūñ''

baat sach ye hai ki ham the jis zamāne meñ javāñ

ḳhāndānī qasam kī mansūba-bandī thī kahāñ

aur ashyā-e-zarūrī bhī na thiiñ itnī girāñ

aaj maiñ huuñ aur merī muflisī kī dāstāñ

''ai ġham-e-dil kyā karūñ, ai vahshat-e-dil kyā karūñ''

suniye ek na-aqibat-andesh ki fariyaad hai

kah raha hai wo mujhe apni jawani yaad hai

main jise kahta tha ghar wo aaj tifl-abaad hai

meri tanha jaan hai aur kasrat-e-aulad hai

ai gham-e-dil kya karun, ai wahshat-e-dil kya karun

wo bhi kya din the ki jab ye muflisi chhai na thi

aashiqi qaid-e-shariat mein abhi aai na thi

kis qadar the mutmain go jeb mein pai na thi

kasrat-e-aulad ke bais ye ruswai na thi

ai gham-e-dil kya karun, ai wahshat-e-dil kya karun

kya KHata meri ki jo bachcha hua juDwan hua

aur ma ham-zad aajiz hi ke ghar mehman hua

mere ghar aaya to goya daKHil-e-zindan hua

mulk mein ghalle ki qillat ka naya unwan hua

ai gham-e-dil kya karun, ai wahshat-e-dil kya karun

ho gae hain ek darjan aaj tak laKHt-e-jigar

ek in mein referee gyarah khilaDi hain magar

is khilaDi team mein footbaal hai in ka pidar

us ko dauDate hain ye bachche idhar gahe udhar

ai gham-e-dil kya karun, ai wahshat-e-dil kya karun

ja ke pahle ke liye moTi sifarish launga

mauqa-be-mauqa aizza ko bahut dauDaunga

apne sare doston ki jaan ko aa jaunga

aur kisi daftar mein us ko naukri dilwaunga

ai gham-e-dil kya karun, ai wahshat-e-dil kya karun

dusra bimar hai launga main us ki dawa

DhunDhta hun tisare ke daKHle ko madrasa

ja ke chauthe ne jo ham-sae se jhagDa kar liya

is ko neki de KHuda se kar raha hun ye dua

ai gham-e-dil kya karun, ai wahshat-e-dil kya karun

panchwan hai aur chhaTa hai aur patangen aur Dor

satwan hai, aaTHwan hai aur nawan karte hain zor

koi bachcha chiKHta hai aur koi karta hai shor

kyunki ye ek dusre ko chheD kar karte hain bor

ai gham-e-dil kya karun, ai wahshat-e-dil kya karun

hain jo daswin, gyarahwin, donon hain kandhon par sawar

ye dila do wo dila do kah rahe hain bar bar

barahwan bachcha jo hai wo kar raha hai man ko KHwar

raat bhar rota hai us ki god mein wo na-bakar

ai gham-e-dil kya karun, ai wahshat-e-dil kya karun

ghar mein motor bhi barae-bar-bardari nahin

sath le jaane mein bachchon ke ba-juz-KHwari nahin

ek bachcha god mein le lun ki wo bhaari nahin

wo magar darjan hain main insan hun lari nahin

ai gham-e-dil kya karun, ai wahshat-e-dil kya karun

baat sach ye hai ki hum the jis zamane mein jawan

KHandani qasam ki mansuba-bandi thi kahan

aur ashya-e-zaruri bhi na thin itni giran

aaj main hun aur meri muflisi ki dastan

ai gham-e-dil kya karun, ai wahshat-e-dil kya karun