kaun gunahgar

aaj sub.h jab āsmāñ par kaale

ghanere abroñ kā baserā thā

maiñ apne baam par rakhī mez par

kal ke aḳhbār ke varaq palaT rahā thā

ik ḳhabar dikhī us meñ jo utar nahīñ rahī thī

zehn se ka.ī martaba dhyān bhaTkāne kī

jidd-o-jahd bhī kī par kāmyāb na huā

aḳhbār bhī murjhā gayā thā is ḳhabar se

shāyad azaab thā use bhī

kaise koī insān dūsre insān ko maar detā hai

kuchh yuuñ mahsūs ho rahā thā jaise us

dūsre insān ke surḳh ḳhuun ke dhabbe mere aḳhbār

ke varaq par bhī paḌe the

ik ajiib sī taaze ḳhuun kī bū aane lagī thī

kaun thā gunahgār is qatl kā

vo pahlā insān jis kī thī fitrat aisī

yā ḳhud ḳhudā

jis ne banāyā thā vo qātil insān

faisla abhī bhī baaqī hai

aaj subh jab aasman par kale

ghanere abron ka basera tha

main apne baam par rakhi mez par

kal ke aKHbar ke waraq palaT raha tha

ek KHabar dikhi us mein jo utar nahin rahi thi

zehn se kai martaba dhyan bhaTkane ki

jidd-o-jahd bhi ki par kaamyab na hua

aKHbar bhi murjha gaya tha is KHabar se

shayad azab tha use bhi

kaise koi insan dusre insan ko mar deta hai

kuchh yun mahsus ho raha tha jaise us

dusre insan ke surKH KHun ke dhabbe mere aKHbar

ke waraq par bhi paDe the

ek ajib si taze KHun ki bu aane lagi thi

kaun tha gunahgar is qatl ka

wo pahla insan jis ki thi fitrat aisi

ya KHud KHuda

jis ne banaya tha wo qatil insan

faisla abhi bhi baqi hai