kaun si disha kahan ki disha

ḳhātme se pahle agar ḳhatm honā hai to samajh lo ki ḳhātma ho chukā hai

silā.ī machine par merī aurat kī niiñd meñ soī girnā

mere maqsūm kā vīrāna hai

havās bahut hai qissoñ par bhārī haiñ

havās jānte haiñ kahā nahīñ jānte hue bhī sabhī jānte haiñ

ki duniyā paidā hī nahīñ huī

jis meñ bheḌiye na hoñ sirf ḳhargosh rah rahe hoñ

vo dekho vo koī safed ḳhargosh hī to hai

jo abhī abhī is jhāḌī se uchhal ke is jhāḌī tak gayā hai

magar us kī safedī meñ Thiik us kī gardan kī jagah

bheḌiye ke daañt lagne se gahre ḳhuun kā muqaddar lagā hai

is tarah muqaddar ko ḳhuun ke dhabbe meñ dekhnā

kahāñ kī duniyā hai

kyā kabhī aisā huā ki maut ne apnī ġhizā meñ ḳhud ko khāyā

us chitrkār ko bulā sako to bulāo

zarā jald bulāo

ki vo kahīñ aur nahīñ hogā

chemistry ke sho.abe meñ hogā

ki jahāñ rakhe hue har rañg meñ us ke apne kīmiyā.ī aaseb kā baserā hai

ham kisī na kisī rañg ko ḳhud taarī hone kī dāvat dete haiñ

aur is ke aaseb se apnī jild nuchvāte haiñ

shiryānoñ ko udhaḌvāte haiñ

har rañg meñ baserā karne vaale aaseb ne hamārī mohabbat hī to khāyā

is liye to maiñ sote apne beTe ko nahīñ jagātā

ki vo har roz motor-cycle meñ petrol kī jagah

apne hisse kī bedārī aur niiñd donoñ ko ek saath Daal detā hai

is liye meñ der tak sotī apnī beTī ko nahīñ jagātā

ki vo kitchen meñ chaa.e banāne kī abdiyat ko bhī

chaa.e kī pyālī meñ uñDel detī hai

KHatme se pahle agar KHatm hona hai to samajh lo ki KHatma ho chuka hai

silai machine par meri aurat ki nind mein soi girna

mere maqsum ka virana hai

hawas bahut hai qisson par bhaari hain

hawas jaante hain kaha nahin jaante hue bhi sabhi jaante hain

ki duniya paida hi nahin hui

jis mein bheDiye na hon sirf KHargosh rah rahe hon

wo dekho wo koi safed KHargosh hi to hai

jo abhi abhi is jhaDi se uchhal ke is jhaDi tak gaya hai

magar us ki safedi mein Thik us ki gardan ki jagah

bheDiye ke dant lagne se gahre KHun ka muqaddar laga hai

is tarah muqaddar ko KHun ke dhabbe mein dekhna

kahan ki duniya hai

kya kabhi aisa hua ki maut ne apni ghiza mein KHud ko khaya

us chitrkar ko bula sako to bulao

zara jald bulao

ki wo kahin aur nahin hoga

chemistry ke shoabe mein hoga

ki jahan rakhe hue har rang mein us ke apne kimiyai aaseb ka basera hai

hum kisi na kisi rang ko KHud tari hone ki dawat dete hain

aur is ke aaseb se apni jild nuchwate hain

shiryanon ko udhaDwate hain

har rang mein basera karne wale aaseb ne hamari mohabbat hi to khaya

is liye to main sote apne beTe ko nahin jagata

ki wo har roz motor-cycle mein petrol ki jagah

apne hisse ki bedari aur nind donon ko ek sath Dal deta hai

is liye mein der tak soti apni beTi ko nahin jagata

ki wo kitchen mein chae banane ki abdiyat ko bhi

chae ki pyali mein unDel deti hai