kawwa aur koyal

kisī kavve ne ik koyal se pūchā

batā bahnā ki hai ye mājrā kyā

ġhazab hai ye ki ham donoñ haiñ kaale

ḳhudā ke fazl se haiñ aql vaale

magar duniyā kare kyuuñ pyaar tujh se

raheñ chhoTe baḌe bezār mujh se

tirā hī naam hai sab kī zabāñ par

tirā jaadū to hai saare jahāñ par

jo shā.er haiñ likheñ terā tarāna

batā terā hai kyuuñ āshiq zamāna

rahā kartī hai tū bachchoñ ke dil meñ

magar ik maiñ ki chuhā jaise bil meñ

jahāñ jā kar karūñ maiñ kaa.eñ kaa.eñ

vahāñ se maar kar mujh ko bhagā.eñ

nazar meñ tiir aur talvār ban kar

khaTaktā huuñ diloñ meñ ḳhaar ban kar

jise dekho use mujh se hai vahshat

sabhī ko naam se mere hai nafrat

kahā koyal ne kavve se ki bhaa.ī

na kyuuñ terī samajh meñ baat aa.ī

jise aatī na ho shīrīñ-bayānī

kare kyā vo diloñ par hukmarānī

haiñ sab us ke jo mīThe bol bole

jo lab khol to ras kānoñ meñ ghole

kahāñ maiñ bolne meñ chūktī huuñ

magar jab boltī huuñ kūktī huuñ

mirī āvāz meñ phūloñ kī narmī

tirī āvāz meñ sho.aloñ kī garmī

zabāñ se maiñ banī ā.ankhoñ kā taarā

magar terī zabāñ ne tujh ko maarā

tū jis din siikh legā ḳhush-kalāmī

milegī har jagah tujh ko salāmī

kisi kawwe ne ek koyal se pucha

bata bahna ki hai ye majra kya

ghazab hai ye ki hum donon hain kale

KHuda ke fazl se hain aql wale

magar duniya kare kyun pyar tujh se

rahen chhoTe baDe bezar mujh se

tera hi nam hai sab ki zaban par

tera jadu to hai sare jahan par

jo shaer hain likhen tera tarana

bata tera hai kyun aashiq zamana

raha karti hai tu bachchon ke dil mein

magar ek main ki chuha jaise bil mein

jahan ja kar karun main kaen kaen

wahan se mar kar mujh ko bhagaen

nazar mein tir aur talwar ban kar

khaTakta hun dilon mein KHar ban kar

jise dekho use mujh se hai wahshat

sabhi ko nam se mere hai nafrat

kaha koyal ne kawwe se ki bhai

na kyun teri samajh mein baat aai

jise aati na ho shirin-bayani

kare kya wo dilon par hukmarani

hain sab us ke jo miThe bol bole

jo lab khol to ras kanon mein ghole

kahan main bolne mein chukti hun

magar jab bolti hun kukti hun

meri aawaz mein phulon ki narmi

teri aawaz mein shoalon ki garmi

zaban se main bani aaankhon ka tara

magar teri zaban ne tujh ko mara

tu jis din sikh lega KHush-kalami

milegi har jagah tujh ko salami