keyboard actiwist

jangoñ ḳhūn-āshāmiyoñ kī gard

chehroñ par oḌhe

hairāñ lab basta bachcho

sāhil par siip kī mānind

auñdhe muñh bikhre motī jaise bachcho

be-libās saḌkoñ par bhāgte

dahshat-zada sūkhe bachcho

ḳhudā ko is duniyā kī shikāyat lagāne vaale

rote bilakte jaañ se guzarte bachcho

tār-tār pairāhan jism darīda ruuh raakh badan

aziim insānī tahzīb ke

malbe tale dabe mazlūm bachcho

tayyāroñ kī ghan-garaj sun kar sahamte

gola-bārī se peT bharte bachcho

kachre se chun kar khāte be-ḳhānumāñ sayyāro

peT kā dozaḳh bharne ko

ghaas ubālte bachcho

ham ne tumhāre liye

kitnī hī udaas nazmeñ likhīñ

nauhe gaa.e

marsiye paḌhe

aur tum phir bhī sākit baiThe ho

duniyā ko shākī nazar se takte ho

batāo bhalā

keyboard activist

aur kyā kar saktā thā

jangon KHun-ashamiyon ki gard

chehron par oDhe

hairan lab basta bachcho

sahil par sip ki manind

aundhe munh bikhre moti jaise bachcho

be-libas saDkon par bhagte

dahshat-zada sukhe bachcho

KHuda ko is duniya ki shikayat lagane wale

rote bilakte jaan se guzarte bachcho

tar-tar pairahan jism darida ruh rakh badan

azim insani tahzib ke

malbe tale dabe mazlum bachcho

tayyaron ki ghan-garaj sun kar sahamte

gola-bari se peT bharte bachcho

kachre se chun kar khate be-KHanuman sayyaro

peT ka dozaKH bharne ko

ghas ubaalte bachcho

hum ne tumhaare liye

kitni hi udas nazmen likhin

nauhe gae

marsiye paDhe

aur tum phir bhi sakit baiThe ho

duniya ko shaki nazar se takte ho

batao bhala

keyboard actiwist

aur kya kar sakta tha