KHak aur KHun

ai mirī mūnis-e-ġham ai mirī pursān-e-mizāj

tū ne afsurdagi-e-dil kā sabab pūchhā hai

kyā batā.ūñ tujhe kis soch meñ hai qalb-e-hazīñ

kyā sunā.ūñ ki mirī aañkh ne kyā dekhā hai

ḳhaak aur ḳhuun ke ġhamnāk manāzir tauba

kis qadar zabt-shikan jalva-gah-e-duniyā hai

hasrateñ ḳhaak meñ miltī huī dekhīñ kyā kyā

kitnī mā'sūm tamannāoñ kā ḳhuuñ dekhā hai

aah vo gul jo na the nīm-shagufta bhī hanūz

daf'atan bād-e-ḳhizāñ ne jinheñ aa rauñdā hai

kitnā be-māya hai is daur meñ insāñ kā lahū

kitnā majbūr hai insān kabhī sochā hai

ik taraf gardish-e-hālāt-e-zamāna hai mire

ik taraf terā ye isrār ki ḳhush rahnā hai

shiddat-e-his mujhe majrūh kiye jaatī hai

zindagī hai ki na.e zaḳhm diye jaatī hai

ai mirī mūnis-e-ġham ai mirī pursān-e-mizāj

tū ne afsurdagi-e-dil kā sabab pūchhā hai

ai meri munis-e-gham ai meri pursan-e-mizaj

tu ne afsurdagi-e-dil ka sabab puchha hai

kya bataun tujhe kis soch mein hai qalb-e-hazin

kya sunaun ki meri aankh ne kya dekha hai

KHak aur KHun ke ghamnak manazir tauba

kis qadar zabt-shikan jalwa-gah-e-duniya hai

hasraten KHak mein milti hui dekhin kya kya

kitni ma'sum tamannaon ka KHun dekha hai

aah wo gul jo na the nim-shagufta bhi hanuz

daf'atan baad-e-KHizan ne jinhen aa raunda hai

kitna be-maya hai is daur mein insan ka lahu

kitna majbur hai insan kabhi socha hai

ek taraf gardish-e-haalat-e-zamana hai mere

ek taraf tera ye israr ki KHush rahna hai

shiddat-e-his mujhe majruh kiye jati hai

zindagi hai ki nae zaKHm diye jati hai

ai meri munis-e-gham ai meri pursan-e-mizaj

tu ne afsurdagi-e-dil ka sabab puchha hai