KHak-e-dil

lucknow mere vatan mere chaman-zār vatan

tere gahvāra-e-āġhosh meñ ai jān-e-bahār

apnī duniyā-e-hasīñ dafn kiye jaatā huuñ

tū ne jis dil ko dhaḌakne kī adā baḳhshī thī

aaj vo dil bhī yahīñ dafn kiye jaatā huuñ

dafn hai dekh mirā ahd-e-bahārāñ tujh meñ

dafn hai dekh mirī rūh-e-gulistāñ tujh meñ

merī gul-posh javāñ-sāl umañgoñ kā suhāg

merī shādāb tamannā ke mahakte hue ḳhvāb

merī bedār javānī ke firozāñ mah o saal

merī shāmoñ kī malāhat mirī sub.hoñ kā jamāl

merī mahfil kā fasāna mirī ḳhalvat kā fusūñ

merī dīvāngī-e-shauq mirā nāz-e-junūñ

mere marne kā salīqa mire jiine kā shu.ūr

merā nāmūs-e-vafā merī mohabbat kā ġhurūr

merī nabzoñ kā tarannum mire naġhmoñ kī pukār

mere sheroñ kī sajāvaT mire gītoñ kā siñgār

lucknow apnā jahāñ sauñp chalā huuñ tujh ko

apnā har ḳhvāb-e-javāñ sauñp chalā huuñ tujh ko

apnā sarmāya-e-jāñ sauñp chalā huuñ tujh ko

lucknow mere vatan mere chaman-zār vatan

ye mire pyaar kā madfan hī nahīñ hai tanhā

dafn haiñ is meñ mohabbat ke ḳhazāne kitne

ek unvān meñ muzmar haiñ fasāne kitne

ik bahan apnī rifāqat kī qasam khaa.e hue

ek maañ mar ke bhī siine meñ liye maañ kā gudāz

apne bachchoñ ke laḌakpan ko kaleje se lagā.e

apne khilte hue ma.asūm shagūfoñ ke liye

band āñkhoñ meñ bahāroñ ke javāñ ḳhvāb basā.e

ye mire pyaar kā madfan hī nahīñ hai tanhā

ek sāthī bhī tah-e-ḳhāk yahāñ sotī hai

arsa-e-dahr kī be-rahm kashākash kā shikār

jaan de kar bhī zamāne se na maane hue haar

apne tevar meñ vahī azm-e-javāñ-sāl liye

ye mire pyaar kā madfan hī nahīñ hai tanhā

dekh ik sham-e-sar-e-rāh-guzar chaltī hai

jagmagātā hai agar koī nishān-e-manzil

zindagī aur bhī kuchh tez qadam chaltī hai

lucknow mere vatan mere chaman-zār vatan

dekh is ḳhvāb-gah-e-nāz pe kal mauj-e-sabā

le ke nau-roz-e-bahārāñ kī ḳhabar aa.egī

surḳh phūloñ kā baḌe naaz se gūñdhe hue haar

kal isī ḳhaak pe gul-rañg sahar aa.egī

kal isī ḳhaak ke zarroñ meñ samā jā.egā rañg

kal mire pyaar kī tasvīr ubhar aa.egī

ai mirī rūh-e-chaman ḳhāk-e-lahad se terī

aaj bhī mujh ko tire pyaar kī bū aatī hai

zaḳhm siine ke mahakte haiñ tirī ḳhushbū se

vo mahak hai ki mirī saañs ghuTī jaatī hai

mujh se kyā baat banā.egī zamāne kī jafā

maut ḳhud aañkh milāte hue sharmātī hai

maiñ aur in āñkhoñ se dekhūñ tujhe paivand-e-zamīñ

is qadar zulm nahīñ haa.e nahīñ haa.e nahīñ

koī ai kaash bujhā de mirī āñkhoñ ke diye

chhīn le mujh se koī kaash nigāheñ merī

ai mirī sham-e-vafā ai mirī manzil ke charāġh

aaj tārīk huī jaatī haiñ rāheñ merī

tujh ko ro.uuñ bhī to kyā ro.uuñ ki in āñkhoñ meñ

ashk patthar kī tarah jam se ga.e haiñ mere

zindagī arsa-gah-e-johd-e-musalsal hī sahī

ek lamhe ko qadam tham se ga.e haiñ mere

phir bhī is arsa-gah-e-johd-e-musalsal se mujhe

koī āvāz pe āvāz diye jaatā hai

aaj sotā hī tujhe chhoḌ ke jaanā hogā

naaz ye bhī ġham-e-daurāñ kā uThānā hogā

zindagī dekh mujhe hukm-e-safar detī hai

ik dil-e-shola-ba-jāñ saath liye jaatā huuñ

har qadam tū ne kabhī azm-e-javāñ baḳhshā thaa!

maiñ vahī azm-e-javāñ saath liye jaatā huuñ

chuum kar aaj tirī ḳhāk-e-lahad ke zarre

an-ginat phuul mohabbat ke chaḌhātā jā.ūñ

jaane is samt kabhī merā guzar ho ki na ho

āḳhirī baar gale tujh ko lagātā jā.ūñ

lucknow mere vatan mere chaman-zār vatan

dekh is ḳhaak ko āñkhoñ meñ basā kar rakhnā

is amānat ko kaleje se lagā kar rakhnā

lucknow mere watan mere chaman-zar watan

tere gahwara-e-aghosh mein ai jaan-e-bahaar

apni duniya-e-hasin dafn kiye jata hun

tu ne jis dil ko dhaDakne ki ada baKHshi thi

aaj wo dil bhi yahin dafn kiye jata hun

dafn hai dekh mera ahd-e-bahaaran tujh mein

dafn hai dekh meri ruh-e-gulistan tujh mein

meri gul-posh jawan-sal umangon ka suhag

meri shadab tamanna ke mahakte hue KHwab

meri bedar jawani ke firozan mah o sal

meri shamon ki malahat meri subhon ka jamal

meri mahfil ka fasana meri KHalwat ka fusun

meri diwangi-e-shauq mera naz-e-junun

mere marne ka saliqa mere jine ka shuur

mera namus-e-wafa meri mohabbat ka ghurur

meri nabzon ka tarannum mere naghmon ki pukar

mere sheron ki sajawaT mere giton ka singar

lucknow apna jahan saunp chala hun tujh ko

apna har KHwab-e-jawan saunp chala hun tujh ko

apna sarmaya-e-jaan saunp chala hun tujh ko

lucknow mere watan mere chaman-zar watan

ye mere pyar ka madfan hi nahin hai tanha

dafn hain is mein mohabbat ke KHazane kitne

ek unwan mein muzmar hain fasane kitne

ek bahan apni rifaqat ki qasam khae hue

ek man mar ke bhi sine mein liye man ka gudaz

apne bachchon ke laDakpan ko kaleje se lagae

apne khilte hue masum shagufon ke liye

band aankhon mein bahaaron ke jawan KHwab basae

ye mere pyar ka madfan hi nahin hai tanha

ek sathi bhi tah-e-KHak yahan soti hai

arsa-e-dahr ki be-rahm kashakash ka shikar

jaan de kar bhi zamane se na mane hue haar

apne tewar mein wahi azm-e-jawan-sal liye

ye mere pyar ka madfan hi nahin hai tanha

dekh ek sham-e-sar-e-rah-guzar chalti hai

jagmagata hai agar koi nishan-e-manzil

zindagi aur bhi kuchh tez qadam chalti hai

lucknow mere watan mere chaman-zar watan

dekh is KHwab-gah-e-naz pe kal mauj-e-saba

le ke nau-roz-e-bahaaran ki KHabar aaegi

surKH phulon ka baDe naz se gundhe hue haar

kal isi KHak pe gul-rang sahar aaegi

kal isi KHak ke zarron mein sama jaega rang

kal mere pyar ki taswir ubhar aaegi

ai meri ruh-e-chaman KHak-e-lahad se teri

aaj bhi mujh ko tere pyar ki bu aati hai

zaKHm sine ke mahakte hain teri KHushbu se

wo mahak hai ki meri sans ghuTi jati hai

mujh se kya baat banaegi zamane ki jafa

maut KHud aankh milate hue sharmati hai

main aur in aankhon se dekhun tujhe paiwand-e-zamin

is qadar zulm nahin hae nahin hae nahin

koi ai kash bujha de meri aankhon ke diye

chhin le mujh se koi kash nigahen meri

ai meri sham-e-wafa ai meri manzil ke charagh

aaj tarik hui jati hain rahen meri

tujh ko roun bhi to kya roun ki in aankhon mein

ashk patthar ki tarah jam se gae hain mere

zindagi arsa-gah-e-johd-e-musalsal hi sahi

ek lamhe ko qadam tham se gae hain mere

phir bhi is arsa-gah-e-johd-e-musalsal se mujhe

koi aawaz pe aawaz diye jata hai

aaj sota hi tujhe chhoD ke jaana hoga

naz ye bhi gham-e-dauran ka uThana hoga

zindagi dekh mujhe hukm-e-safar deti hai

ek dil-e-shola-ba-jaan sath liye jata hun

har qadam tu ne kabhi azm-e-jawan baKHsha tha!

main wahi azm-e-jawan sath liye jata hun

chum kar aaj teri KHak-e-lahad ke zarre

an-ginat phul mohabbat ke chaDhata jaun

jaane is samt kabhi mera guzar ho ki na ho

aaKHiri bar gale tujh ko lagata jaun

lucknow mere watan mere chaman-zar watan

dekh is KHak ko aankhon mein basa kar rakhna

is amanat ko kaleje se laga kar rakhna