KHamosh raho

jo kuchh dekho vo na kaho ḳhāmosh raho

socho lekin lab sī lo ḳhāmosh raho

ḳhuddārī kā ḳhuun karo ḳhāmosh raho

āgāhī kā karb saho ḳhāmosh raho

tum ho mohazzab kyuuñ karte ho shor-o-ġhul

chain se apne ghar baiTho ḳhāmosh raho

har lafḌe se bhāgo jitnā bhaag sako

har jhagḌe se duur raho ḳhāmosh raho

aag lage insān mareñ yā shahr luTe

tum na kuḌho tum mat bolo ḳhāmosh raho

e.azāz apnā tum ne kyuuñ lauTāyā hai

aag parā.ī meñ na jalo ḳhāmosh raho

sach kā sāthī is dhartī par koī nahīñ

tanhā ho socho samjho ḳhāmosh raho

bahutere haiñ haq-goī ke da.avedār

tum hī kyuuñ mansūr bano ḳhāmosh raho

mere bhaa.ī vaqt burā hai chup baiTho

'nāzish' ko bhī samjhāo ḳhāmosh raho

jo kuchh dekho wo na kaho KHamosh raho

socho lekin lab si lo KHamosh raho

KHuddari ka KHun karo KHamosh raho

aagahi ka karb saho KHamosh raho

tum ho mohazzab kyun karte ho shor-o-ghul

chain se apne ghar baiTho KHamosh raho

har lafDe se bhago jitna bhag sako

har jhagDe se dur raho KHamosh raho

aag lage insan maren ya shahr luTe

tum na kuDho tum mat bolo KHamosh raho

eazaz apna tum ne kyun lauTaya hai

aag parai mein na jalo KHamosh raho

sach ka sathi is dharti par koi nahin

tanha ho socho samjho KHamosh raho

bahutere hain haq-goi ke dawedar

tum hi kyun mansur bano KHamosh raho

mere bhai waqt bura hai chup baiTho

'nazish' ko bhi samjhao KHamosh raho