KHana-ba-dosh

shāḳhoñ pe surḳh-o-zard shagūfe haiñ mahv-e-ḳhvāb

ḳhvāb-e-girāñ se jāgne vaalā hai āftāb

gesū khule hue haiñ urūs-e-bahār ke

shāne hilā rahī hai sabā lāla-zār ke

vīrān ho chalī hai sitāroñ kī anjuman

dāmān-e-kohsār meñ jaise haiñ ḳhema-zan

vo log paikar-e-ġham-o-hirmāñ kaheñ jinheñ

betābiyoñ ke ruup meñ insāñ kaheñ jinheñ

har saañs ek mahshar-e-pinhāñ liye hue

bedāriyāñ bhī ḳhvāb-e-pareshāñ liye hue

ambār-e-ārzū se tanaffus rukā huā

ifrāt-e-ġham se ruuh kā parcham jhukā huā

nauras kañval sumūm-e-ajal kī panāh meñ

be-jān hasratoñ ke talātum nigāh meñ

sīnoñ meñ dil kashākash-e-hastī se daaġh daaġh

insāniyat kī qabr ke bujhte hue charāġh

hoñToñ pe āh-e-sard jabīñ par ġhubār-e-rāh

haiñ is zamīñ pe ḳhāk-basar kitne mehr-o-māh

shaKHon pe surKH-o-zard shagufe hain mahw-e-KHwab

KHwab-e-giran se jagne wala hai aaftab

gesu khule hue hain urus-e-bahaar ke

shane hila rahi hai saba lala-zar ke

viran ho chali hai sitaron ki anjuman

daman-e-kohsar mein jaise hain KHema-zan

wo log paikar-e-gham-o-hirman kahen jinhen

betabiyon ke rup mein insan kahen jinhen

har sans ek mahshar-e-pinhan liye hue

bedariyan bhi KHwab-e-pareshan liye hue

ambar-e-arzu se tanaffus ruka hua

ifraat-e-gham se ruh ka parcham jhuka hua

nauras kanwal sumum-e-ajal ki panah mein

be-jaan hasraton ke talatum nigah mein

sinon mein dil kashakash-e-hasti se dagh dagh

insaniyat ki qabr ke bujhte hue charagh

honTon pe aah-e-sard jabin par ghubar-e-rah

hain is zamin pe KHak-basar kitne mehr-o-mah