KHatun-e-KHana

maiñ apnī aulād ke liye

duudh kī ek botal

apne sāhab ke liye taskīn

ghar ke liye machine

aur apne liye

ek aahaT ban ke rah ga.ī huuñ

merā ghar

jahāñ mujhe raat aur din

intizār ke dahakte hue lams

lapeT kar sonā paḌ rahā hai

ḳhayāl kī adh-silī baas se

kalā.iyoñ ke gajre gūñdh kar

siñghār karnā paḌ rahā hai

tanhā.iyoñ ke savāl

hoñT kī surḳhiyoñ kī

tahoñ meñ dabā kar

alvidā'ī bosoñ kā

javāb sahnā paḌ rahā hai

ḳhamosh TaToltī huī

putliyāñ kājaloñ kī lakīroñ kī jagah

sajā kar āñsuoñ ke darmiyān

hañsnā paḌ rahā hai

merā ghar jahāñ mujhe ashyā-e-sarf kī tarah

rahnā paḌ rahā hai

main apni aulad ke liye

dudh ki ek botal

apne sahab ke liye taskin

ghar ke liye machine

aur apne liye

ek aahaT ban ke rah gai hun

mera ghar

jahan mujhe raat aur din

intizar ke dahakte hue lams

lapeT kar sona paD raha hai

KHayal ki adh-sili bas se

kalaiyon ke gajre gundh kar

singhaar karna paD raha hai

tanhaiyon ke sawal

honT ki surKHiyon ki

tahon mein daba kar

alwida'i boson ka

jawab sahna paD raha hai

KHamosh TaTolti hui

putliyan kajalon ki lakiron ki jagah

saja kar aansuon ke darmiyan

hansna paD raha hai

mera ghar jahan mujhe ashya-e-sarf ki tarah

rahna paD raha hai