KHatun-e-mashriq

ġhuncha-e-dil mard kā roz-e-azal jab khul chukā

jis qadar taqdīr meñ likkhā huā thā mil chukā

daf.atan gūñjī sadā phir ālam-e-anvār meñ

aurteñ duniyā kī hāzir hoñ mire darbār meñ

auratoñ kā kārvāñ par kārvāñ aane lagā

phir fazā meñ parcham-e-in.ām lahrāne lagā

naaz se hūreñ tarāne hamd ke gaane lagīñ

aurteñ bhar bhar ke apnī jholiyāñ jaane lagīñ

jab rahā kuchh bhī na baaqī kīsa-e-in.ām meñ

kāñptī hāzir huiiñ phir asia kī aurteñ

dil meñ ḳhauf-e-shuma.i-e-qismat se ghabrā.ī huī

ro.ab se nīchī nigāheñ aañkh sharmā.ī huī

hilm ke sāñche meñ rūh-e-nāz ko Dhāle hue

gardanoñ meñ ḳham saroñ par chādareñ Daale hue

āḳhir is andāz par rahmat ko pyaar aa hī gayā

mai-kade par jhuum kar abr-e-bahār aa hī gayā

muskurā kar ḳhāliq-e-arz-o-samā ne dī nidā

ai ġhazāl-e-mashriqī aa taḳht ke nazdīk aa

nemateñ sab baT chukīñ lekin na honā muzmahil

sab ko baḳhshe haiñ dimāġh aur le tujhe dete haiñ dil

ye vahī dil hai jo mazrab hoke soz o saaz se

mere pahlū meñ dhaḌaktā thā ajab andāz se

tujh ko vo ruḳh apnī sīrat kā diye dete haiñ ham

jis meñ yazdānī nissā.iyat kī zulfoñ ke haiñ ḳham

aa ki tujh ko sāhib-e-mahr-o-vafā karte haiñ ham

le ḳhud apnī jumbish-e-mizhgāñ atā karte haiñ ham

pahlū-e-ḳhātūn-e-mashriq meñ ba-sad tamkīn o naaz

muntaqil ho jā ulūhiyat ke siine ke gudāz

aurteñ aqvām-e-ālam kī bhaTak jā.eñgī jab

tū rahegī ban ke us tūfāñ meñ ik mauj-e-tarab

husn ho jā.egā jab auroñ kā vaqf-e-ḳhās-o-ām

dīdanī hogā tire ḳhalvat-kade kā ehtimām

ālam-e-nisvāñ pe kaalī raat jab chhā jā.egī

ye tire māthe kī biñdī sub.h ko sharmā.egī

aurteñ bechaiñgī jab stage par bā-raqs-o-chañg

apnī āñkhoñ kī lagāvaT apne ruḳhsāroñ kā rañg

un ke aage har nayā maidān hogā jalva-gāh

aur tirā stage hogā sirf shauhar kī nigāh

godiyāñ phailā ke jab māñgeñgī bā-sidq-o-safā

aurteñ aulād ke paidā na hone kī duā

muzhda-bād ai asia kī duḳhtar-e-pākīza-tar

aañch aa.egī na tere madarāna zauq par

maaoñ kī ġhaflat se jab bachchoñ ko pahuñchegā gazand

jab fuġhāñ be-tarbiyat aulād kī hogī buland

sirf ik terā tabassum ai jamāl-e-tābnāk

sīna-e-atfāl meñ paidā karegā rūh-e-pāk

vo harārat tere hoñToñ kī na hogī pā.emāl

jiske sho.aloñ se nikhar jaatā hai rañg-e-naunihāl

vo tirī ma.asūm ra.anā.ī na hogī muzmahil

baḳhshatī hai nasl-e-insānī ke pahlū ko jo dil

vo bhī din aa.egā jab tujh ko hī ai mast-e-hijāb

zeb degā māthar-e-aulād-e-ādam kā ḳhitāb

jab karegī sinf-e-nāzuk apnī uryānī pe naaz

sirf ik tū is talātum meñ rahegī pāk-bāz

unke dil jab hoñge yād-e-ma.asiyat se paash paash

tere ruḳh par ek bhī hogī na maazī kī ḳharāsh

un kī rāteñ ḳhauf-e-rusvā.ī se hoñgī jab darāz

tere siine meñ kisī shab kā na hogā koī raaz

dahshat-e-fardā se tharrā.egā jab un kā ġhurūr

haal se tū hogī raazī ḳhauf-e-mustaqbil se duur

jab uḌegī un kī chashm-e-dām-e-parvarda meñ ḳhaak

narm Dore terī āñkhoñ ke raheñge tābnāk

narm hoñge tere jalve bhī tirī guftār bhī

bā-hayā hogī tirī pāzeb kī jhankār bhī

chhāñv bhī hogī na terī bazm-e-nāv-nosh meñ

terā partav tak rahegā sharm ke āġhosh meñ

ai shuā-e-arz-e-mashriq terī iffat kā shi.ār

kaj karegā mulk o millat kī kulāh-e-iftiḳhār

aabrū hogā gharāne bhar kī terā rakh-rakhāo

degā terā baap shān-e-faḳhr se moñchhoñ pe taav

terī āñkhoñ kī kiran se ai jahān-e-e'tibār

jagmagā.egī nasab-nāmoñ kī lauh-e-zar-nigār

bul-havas kā sar jhukā degī tirī adnā jhalak

hogī lahje meñ tire nabz-e-tahārat kī dhamak

terī peshānī pe jhalkegā misāl-e-barq-e-tūr

tifl kā nāz-e-sharāfat aur shauhar kā ġhurūr

ilm se har chand tujh ko kam kiyā hai bahra-mand

lekin is se ho na ai ma.asūm aurat dard-mand

jab zarūrat se ziyāda naaz farmātā hai ilm

āriz-e-tābāñ ke bhole-pan ko khā jaatā hai ilm

nutq ho jaatā hai ilmī istelāhoñ se udaas

la.al-e-lab meñ shahad kī baaqī nahīñ rahtī miThās

ilm uThā letā hai bazm-e-jāñ se sham-e-etaqād

ḳhāl-o-ḳhad kī maut hai chehre kī shān-e-ijtihād

qa.ar-e-vahshat kī taraf muḌtī hai aksar rāh-e-fan

jhāñktī rahtī hai is ġhurfe se chashm-s-ahraman

chhoḌ detī takallum ko mulā.em qīl-o-qāl

ilm kā had se guzar jaanā hai tauhīn-e-jamāl

ilm se baḌhtī hai aql aur aql hai vo bad-dimāġh

jo bujhā detī hai siine meñ mohabbat kā charāġh

ilm se baaqī nahīñ rahte mohabbat ke sifāt

aur mohabbat hai faqat le de ke terī kā.enāt

dekh tujh par ilm kī bharpūr paḌ jaa.e na zarb

bhaag is parde meñ haiñ shaitān ke ālāt-e-harb

ilm se rahtī hai pāband-e-shikan jis kī jabīñ

naaz se shānoñ par us kī zulf lahrātī nahīñ

vaqt se pahle bulā lete haiñ piirī ko uluum

umr se aage nikal jaate haiñ chehre bil-umūm

jin laboñ ko chaaT paḌ jaatī hai qīl-o-qāl kī

un kī garmī ko tarastī hai jabīñ atfāl kī

ik junūñ-parvar bagūlā hai vo ilm-e-be-vasūq

jis kī rau meñ kāñpne lagte haiñ shauhar ke huqūq

duur hī se aise ilm-e-jahl-parvar ko salām

husn-e-nisvāñ ko banā detā ho jo jāgīr-e-ām

jis jagah hūrān-e-jannat kā kiyā hai tazkira

kyā kahā hai aur bhī kuchh ham ne juz husn o hayā

tazkira hūroñ kā hai mahz ek tasvīr-e-jamāl

ham ne kyā unko kahā hai ''sāhib-e-fazl-o-kamāl''

hech hai har chiiz zevar ġhāza afshāñ rañg o ḳhaal

husn ḳhud apnī jagah hai sau kamāloñ kā kamāl

chāñdnī, qaus-e-quzah, aurat, shagūfa, lāla-zār

ilm kā in narm shānoñ par koī rakhtā hai baar?

raushnā.ī meñ kahīñ ghultī hai mauj-e-māhtāb

kyā koī aurāq-e-gul par tab.a kartā hai kitāb

mere aalam meñ nahīñ is bad-mazāqī kā shi.ār

kākul-e-afsāna ho dosh-e-haqīqat se do-chār

husn kā āġhosh-e-rañgīñ dil-fareb-o-dilrubā

ilm se ban jaa.e aqlīdas kā mahz ik dā.era!

mus.haf-e-rū-e-kitābī rū-kash-e-nāz-e-gulāb

aur ban jaa.e ye ne.amat daftar-e-ilm-e-hisāb

naġhma-e-shīrīñ ke dāman meñ ho shor-e-kā.enāt

bazm-e-kāvish meñ jale sham-e-shabistān-e-hayāt

garm ho tezāb kī khaulan se laale kā ayāġh

ġhuncha-e-nauras kā taaq aur pīr-e-maktab kā charāg

shahpar-e-bulbul pe khīñchī jaa.e tasvīr-e-shiġhāl!

motiyoñ par sabt ho tūfān kī mohr-e-jalāl

sub.h ġharq-e-bahas ho ġhunche khilāne ke evaz

dars deñ maujeñ sabā kī gungunāne kī evaz

tū na karnā maġhribī matvāliyoñ kī race dekh

ghaat meñ terī lagā hai fitna-e-iblīs dekh

tū na un kī tarah bharnā arsa-e-fan meñ chhalāñg

kokh tā ThanDī rahe bachchoñ se aur sandal se maañg

duḳhtaran-e-maġhribī ko de na aurat kā ḳhitāb

ye mujassam ho ga.e haiñ kuchh gunahgāroñ ke ḳhvāb

phir rahī haiñ yā tirī nazroñ ke aage pur-fazā

auratoñ ke bhes meñ shaitān kī sartābiyāñ

ilm hāsil kar faqat tadbīr-e-manzil ke liye

vo dimāġhoñ ke liye haiñ aur tū dil ke liye!

ghuncha-e-dil mard ka roz-e-azal jab khul chuka

jis qadar taqdir mein likkha hua tha mil chuka

dafatan gunji sada phir aalam-e-anwar mein

aurten duniya ki hazir hon mere darbar mein

auraton ka karwan par karwan aane laga

phir faza mein parcham-e-inam lahrane laga

naz se huren tarane hamd ke gane lagin

aurten bhar bhar ke apni jholiyan jaane lagin

jab raha kuchh bhi na baqi kisa-e-inam mein

kanpti hazir huin phir asia ki aurten

dil mein KHauf-e-shumai-e-qismat se ghabrai hui

roab se nichi nigahen aankh sharmai hui

hilm ke sanche mein ruh-e-naz ko Dhaale hue

gardanon mein KHam saron par chadaren Dale hue

aaKHir is andaz par rahmat ko pyar aa hi gaya

mai-kade par jhum kar abr-e-bahaar aa hi gaya

muskura kar KHaliq-e-arz-o-sama ne di nida

ai ghazal-e-mashriqi aa taKHt ke nazdik aa

nematen sab baT chukin lekin na hona muzmahil

sab ko baKHshe hain dimagh aur le tujhe dete hain dil

ye wahi dil hai jo mazrab hoke soz o saz se

mere pahlu mein dhaDakta tha ajab andaz se

tujh ko wo ruKH apni sirat ka diye dete hain hum

jis mein yazdani nissaiyat ki zulfon ke hain KHam

aa ki tujh ko sahib-e-mahr-o-wafa karte hain hum

le KHud apni jumbish-e-mizhgan ata karte hain hum

pahlu-e-KHatun-e-mashriq mein ba-sad tamkin o naz

muntaqil ho ja uluhiyat ke sine ke gudaz

aurten aqwam-e-alam ki bhaTak jaengi jab

tu rahegi ban ke us tufan mein ek mauj-e-tarab

husn ho jaega jab auron ka waqf-e-KHas-o-am

didani hoga tere KHalwat-kade ka ehtimam

aalam-e-niswan pe kali raat jab chha jaegi

ye tere mathe ki bindi subh ko sharmaegi

aurten bechaingi jab stage par ba-raqs-o-chang

apni aankhon ki lagawaT apne ruKHsaron ka rang

un ke aage har naya maidan hoga jalwa-gah

aur tera stage hoga sirf shauhar ki nigah

godiyan phaila ke jab mangengi ba-sidq-o-safa

aurten aulad ke paida na hone ki dua

muzhda-baad ai asia ki duKHtar-e-pakiza-tar

aanch aaegi na tere madarana zauq par

maon ki ghaflat se jab bachchon ko pahunchega gazand

jab fughan be-tarbiyat aulad ki hogi buland

sirf ek tera tabassum ai jamal-e-tabnak

sina-e-atfal mein paida karega ruh-e-pak

wo hararat tere honTon ki na hogi paemal

jiske shoalon se nikhar jata hai rang-e-naunihaal

wo teri masum ranai na hogi muzmahil

baKHshati hai nasl-e-insani ke pahlu ko jo dil

wo bhi din aaega jab tujh ko hi ai mast-e-hijab

zeb dega mathar-e-aulad-e-adam ka KHitab

jab karegi sinf-e-nazuk apni uryani pe naz

sirf ek tu is talatum mein rahegi pak-baz

unke dil jab honge yaad-e-masiyat se pash pash

tere ruKH par ek bhi hogi na mazi ki KHarash

un ki raaten KHauf-e-ruswai se hongi jab daraaz

tere sine mein kisi shab ka na hoga koi raaz

dahshat-e-farda se tharraega jab un ka ghurur

haal se tu hogi raazi KHauf-e-mustaqbil se dur

jab uDegi un ki chashm-e-dam-e-parwarda mein KHak

narm Dore teri aankhon ke rahenge tabnak

narm honge tere jalwe bhi teri guftar bhi

ba-haya hogi teri pazeb ki jhankar bhi

chhanw bhi hogi na teri bazm-e-naw-nosh mein

tera partaw tak rahega sharm ke aaghosh mein

ai shua-e-arz-e-mashriq teri iffat ka shiar

kaj karega mulk o millat ki kulah-e-iftiKHar

aabru hoga gharane bhar ki tera rakh-rakhao

dega tera bap shan-e-faKHr se monchhon pe taw

teri aankhon ki kiran se ai jahan-e-e'tibar

jagmagaegi nasab-namon ki lauh-e-zar-nigar

bul-hawas ka sar jhuka degi teri adna jhalak

hogi lahje mein tere nabz-e-tahaarat ki dhamak

teri peshani pe jhalkega misal-e-barq-e-tur

tifl ka naz-e-sharafat aur shauhar ka ghurur

ilm se har chand tujh ko kam kiya hai bahra-mand

lekin is se ho na ai masum aurat dard-mand

jab zarurat se ziyaada naz farmata hai ilm

aariz-e-taban ke bhole-pan ko kha jata hai ilm

nutq ho jata hai ilmi istelahon se udas

lal-e-lab mein shahad ki baqi nahin rahti miThas

ilm uTha leta hai bazm-e-jaan se sham-e-etaqad

KHal-o-KHad ki maut hai chehre ki shan-e-ijtihad

qar-e-wahshat ki taraf muDti hai aksar rah-e-fan

jhankti rahti hai is ghurfe se chashm-s-ahraman

chhoD deti takallum ko mulaem qil-o-qal

ilm ka had se guzar jaana hai tauhin-e-jamal

ilm se baDhti hai aql aur aql hai wo bad-dimagh

jo bujha deti hai sine mein mohabbat ka charagh

ilm se baqi nahin rahte mohabbat ke sifat

aur mohabbat hai faqat le de ke teri kaenat

dekh tujh par ilm ki bharpur paD jae na zarb

bhag is parde mein hain shaitan ke aalat-e-harb

ilm se rahti hai paband-e-shikan jis ki jabin

naz se shanon par us ki zulf lahraati nahin

waqt se pahle bula lete hain piri ko ulum

umr se aage nikal jate hain chehre bil-umum

jin labon ko chaT paD jati hai qil-o-qal ki

un ki garmi ko tarasti hai jabin atfal ki

ek junun-parwar bagula hai wo ilm-e-be-wasuq

jis ki rau mein kanpne lagte hain shauhar ke huquq

dur hi se aise ilm-e-jahl-parwar ko salam

husn-e-niswan ko bana deta ho jo jagir-e-am

jis jagah huran-e-jannat ka kiya hai tazkira

kya kaha hai aur bhi kuchh hum ne juz husn o haya

tazkira huron ka hai mahz ek taswir-e-jamal

hum ne kya unko kaha hai sahib-e-fazl-o-kamal

hech hai har chiz zewar ghaza afshan rang o KHal

husn KHud apni jagah hai sau kamalon ka kamal

chandni, qaus-e-quzah, aurat, shagufa, lala-zar

ilm ka in narm shanon par koi rakhta hai bar?

raushnai mein kahin ghulti hai mauj-e-mahtab

kya koi auraq-e-gul par taba karta hai kitab

mere aalam mein nahin is bad-mazaqi ka shiar

kakul-e-afsana ho dosh-e-haqiqat se do-chaar

husn ka aaghosh-e-rangin dil-fareb-o-dilruba

ilm se ban jae aqlidas ka mahz ek daera!

mushaf-e-ru-e-kitabi ru-kash-e-naz-e-gulab

aur ban jae ye neamat daftar-e-ilm-e-hisab

naghma-e-shirin ke daman mein ho shor-e-kaenat

bazm-e-kawish mein jale sham-e-shabistan-e-hayat

garm ho tezab ki khaulan se lale ka ayagh

ghuncha-e-nauras ka taq aur pir-e-maktab ka charag

shahpar-e-bulbul pe khinchi jae taswir-e-shighaal!

motiyon par sabt ho tufan ki mohr-e-jalal

subh gharq-e-bahas ho ghunche khilane ke ewaz

dars den maujen saba ki gungunane ki ewaz

tu na karna maghribi matwaliyon ki race dekh

ghat mein teri laga hai fitna-e-iblis dekh

tu na un ki tarah bharna arsa-e-fan mein chhalang

kokh ta ThanDi rahe bachchon se aur sandal se mang

duKHtaran-e-maghribi ko de na aurat ka KHitab

ye mujassam ho gae hain kuchh gunahgaron ke KHwab

phir rahi hain ya teri nazron ke aage pur-faza

auraton ke bhes mein shaitan ki sartabiyan

ilm hasil kar faqat tadbir-e-manzil ke liye

wo dimaghon ke liye hain aur tu dil ke liye!