KHabar mafqud hai lekin

ḳhabar mafqūd hai lekin

lahū meñ bhāgtī ḳhvāhish umīdoñ ke hare sāhil pe hairāñ hai

use kashf-e-sahar jo bhī huā

sūraj se ḳhālī hai

use jo rāste sauñpe ga.e taqsīm hote zāviyoñ meñ saañs lete haiñ

khulī āñkhoñ meñ raushan

chāñd tāroñ ke chamakne se bahut pahle

ġhanīm-e-vus.at-e-dāmāñ

hazāroñ chaah DhūñDh letā hai

ḳhabar mafqūd hai lekin

hisār-e-zāt se niklā huā jazba

sar-e-mehrāb-o-member dār-o-maqtal tak nahīñ aayā

huā sattar qadam kā marsiya maile phaTe malbūs

ghoḌoñ ke sumoñ se meḳh hotī aarzū apnī gavāhī kis tarah degī

muayyan hausle sandūqchoñ meñ jāñ-ba-lab haiñ

aur tavānā bāzuoñ meñ

chūḌiyoñ kī misl zanjīr-e-kuhan āvāz detī hai

ḳhabar mafqūd hai lekin

kaho tum to kaho jo baat kahnā hai

KHabar mafqud hai lekin

lahu mein bhagti KHwahish umidon ke hare sahil pe hairan hai

use kashf-e-sahar jo bhi hua

suraj se KHali hai

use jo raste saunpe gae taqsim hote zawiyon mein sans lete hain

khuli aankhon mein raushan

chand taron ke chamakne se bahut pahle

ghanim-e-wusat-e-daman

hazaron chah DhunDh leta hai

KHabar mafqud hai lekin

hisar-e-zat se nikla hua jazba

sar-e-mehrab-o-member dar-o-maqtal tak nahin aaya

hua sattar qadam ka marsiya maile phaTe malbus

ghoDon ke sumon se meKH hoti aarzu apni gawahi kis tarah degi

muayyan hausle sanduqchon mein jaan-ba-lab hain

aur tawana bazuon mein

chuDiyon ki misl zanjir-e-kuhan aawaz deti hai

KHabar mafqud hai lekin

kaho tum to kaho jo baat kahna hai