khanDar aaseb aur phul

ye bhī tilism-e-hosh-rubā hai

zinda chalte-phirte hañste rote nafrat aur mohabbat karte insāñ

sirf hayūle aur dhuveñ ke marġhūle haiñ

ham sab apnī apnī lāsheñ apne tavahhum ke kāñdhoñ par laade sust-qadam vāmāñda

ḳhāk-ba-sar dāmān-e-darīda zaḳhmī pairoñ se kāñToñ añgāroñ par chalte rahte haiñ

ham sab ek baḌe qabristāñ ke āvāra bhuut haiñ

jin ke jism to haath lagāne se tahlīl ḳhalā meñ hoñ

jin kī rūhoñ kā zāhir se zāhir gosha haath na aa.e

ham ko maazī se virse meñ kohna qabreñ, girte malbe aur āseb-zada khañDaroñ ke Dher mile haiñ

vo raushan shab-tāb diye jin se maazī ko nuur milā thā

is āseb-zada māhaul meñ yuuñ julte haiñ

jaise ik pur-haul bayābāñ ke tiira sannāTe meñ

kuchh bhūtoñ ne

rah-gum-karda sayyāhoñ ko bhaTkāne kī ḳhātir aag jalā.ī ho

ab ye ujāle sirf dhuāñ haiñ

aur āseb-zada khañDaroñ kī chhat ke chaTaḳhte shahtīroñ ke shor meñ koī hañstā hai

jhaḌtā chūnā girtī miTTī niim muallaq dīvār-o-dar

chupke chupke rote haiñ

tāqoñ ke ḳhāmosh diye zulmat ko baḌhāvā dete haiñ

sehn ke sadhā saal purāne būḌhe peḌ

qabroñ ke bedard mujāvar ban kar lāshoñ par sūkhe pattoñ ke Dher lagā dete haiñ

ham sab apnī apnī lāsheñ apne anā ke dosh pe laade

ik qabristāñ kī pur-haul udāsī se uktā.e hue

ek na.e shamshān kā rasta DhūñD rahe haiñ

muntazir-e-marg-e-amboh hujūm āñkhoñ ke ḳhālī kaase khole har-sū dekh rahā hai

jaane kab koī aa.egā jo apne dāman kī havā se

bhūtoñ kā jalnā dekhegā

aur bhayānak saa.e gale mil mil kar khokhlī āvāzoñ meñ ro.eñge

is manzar meñ jaane phir aisā koī aa.e ki na aa.e

hajv vīrāñ māyūs nigāhoñ kī ḳhālī jholī phailā.e

raakh meñ phuul kuredegā

ye bhi tilism-e-hosh-ruba hai

zinda chalte-phirte hanste rote nafrat aur mohabbat karte insan

sirf hayule aur dhuwen ke marghule hain

hum sab apni apni lashen apne tawahhum ke kandhon par lade sust-qadam wamanda

KHak-ba-sar daman-e-darida zaKHmi pairon se kanTon angaron par chalte rahte hain

hum sab ek baDe qabristan ke aawara bhut hain

jin ke jism to hath lagane se tahlil KHala mein hon

jin ki ruhon ka zahir se zahir gosha hath na aae

hum ko mazi se wirse mein kohna qabren, girte malbe aur aaseb-zada khanDaron ke Dher mile hain

wo raushan shab-tab diye jin se mazi ko nur mila tha

is aaseb-zada mahaul mein yun julte hain

jaise ek pur-haul bayaban ke tera sannaTe mein

kuchh bhuton ne

rah-gum-karda sayyahon ko bhaTkane ki KHatir aag jalai ho

ab ye ujale sirf dhuan hain

aur aaseb-zada khanDaron ki chhat ke chaTaKHte shahtiron ke shor mein koi hansta hai

jhaDta chuna girti miTTi nim muallaq diwar-o-dar

chupke chupke rote hain

taqon ke KHamosh diye zulmat ko baDhawa dete hain

sehn ke sadha sal purane buDhe peD

qabron ke bedard mujawar ban kar lashon par sukhe patton ke Dher laga dete hain

hum sab apni apni lashen apne ana ke dosh pe lade

ek qabristan ki pur-haul udasi se uktae hue

ek nae shamshan ka rasta DhunD rahe hain

muntazir-e-marg-e-amboh hujum aankhon ke KHali kase khole har-su dekh raha hai

jaane kab koi aaega jo apne daman ki hawa se

bhuton ka jalna dekhega

aur bhayanak sae gale mil mil kar khokhli aawazon mein roenge

is manzar mein jaane phir aisa koi aae ki na aae

hajw viran mayus nigahon ki KHali jholi phailae

rakh mein phul kuredega