khanDar

kaisī ḳhāmoshī hai vīrānī hai sannāTā hai

koī aahaT hai na āvāz na koī dhaḌkan

dil hai yā qabr sulagtī huī tanhā.ī kī

zehan hai yā kisī beva kā akelā āñgan

uḌ gayā rañg har ik soch ke ā.īñe kā

shab ke be-nūr dupaTTe se sitāre TuuTe

jam ga.ī gard ḳhayāloñ kī hasīñ rāhoñ par

muddateñ ho ga.iiñ ummīd kā dāman chhūTe

yak-ba-yak duur bahut duur bahut duur kahīñ

terī pāzeb chhanakne kī sadā aane lagī

shauq ne paañv baḌhā.e usī āvāz kī samt

tujh se milne kī lagan aur bhī taḌpāne lagī

ye khañDar aaj jahāñ raat kī tārīkī meñ

tū ne bhūle hue afsāne ko dohrāyā hai

isī ujḌe hue vīrān khañDar meñ ki jahāñ

kitne din ba.ad tirā saaya nazar aayā hai

isī ujḌe hue vīrān khañDar meñ ham ne

umr bhar saath nibhāne kī qasam khaa.ī thī

isī ujḌe hue vīrān khañDar meñ tere

thartharāte hue hoñToñ pe duā aa.ī thī

rasm koī ho magar ham ko judā kar na sake

ye rivāyāt na pahnā.eñ kabhī zanjīreñ

ham ki is raaz se is baat se nā-vāqif the

ki duāoñ se badaltī hī nahīñ taqdīreñ

lekin ab rasm koī kuchh na kahegī mujh se

ab rivāyāt ko majbūr kiyā hai maiñ ne

ab na rokegā mirī raah zamāna baḌh kar

jo bhī anjām ho ye soch liyā hai maiñ ne

maiñ muqaddar se gale mil ke nahīñ ro saktā

tujh ko paanā mirā maqsad hai tujhe pā.ūñgā

aaj Thukrā ke har ik maslahat-andeshī ko

tere saa.e ke ta.āqub meñ chalā jā.ūñgā

kaisi KHamoshi hai virani hai sannaTa hai

koi aahaT hai na aawaz na koi dhaDkan

dil hai ya qabr sulagti hui tanhai ki

zehan hai ya kisi bewa ka akela aangan

uD gaya rang har ek soch ke aaine ka

shab ke be-nur dupaTTe se sitare TuTe

jam gai gard KHayalon ki hasin rahon par

muddaten ho gain ummid ka daman chhuTe

yak-ba-yak dur bahut dur bahut dur kahin

teri pazeb chhanakne ki sada aane lagi

shauq ne panw baDhae usi aawaz ki samt

tujh se milne ki lagan aur bhi taDpane lagi

ye khanDar aaj jahan raat ki tariki mein

tu ne bhule hue afsane ko dohraya hai

isi ujDe hue viran khanDar mein ki jahan

kitne din baad tera saya nazar aaya hai

isi ujDe hue viran khanDar mein hum ne

umr bhar sath nibhane ki qasam khai thi

isi ujDe hue viran khanDar mein tere

thartharaate hue honTon pe dua aai thi

rasm koi ho magar hum ko juda kar na sake

ye riwayat na pahnaen kabhi zanjiren

hum ki is raaz se is baat se na-waqif the

ki duaon se badalti hi nahin taqdiren

lekin ab rasm koi kuchh na kahegi mujh se

ab riwayat ko majbur kiya hai main ne

ab na rokega meri rah zamana baDh kar

jo bhi anjam ho ye soch liya hai main ne

main muqaddar se gale mil ke nahin ro sakta

tujh ko pana mera maqsad hai tujhe paunga

aaj Thukra ke har ek maslahat-andeshi ko

tere sae ke taaqub mein chala jaunga