khanDar

isī udaas khañDar ke udaas Tiile par

jahāñ paḌe haiñ nukīle se surma.ī kañkar

jahāñ kī ḳhaak pe shabnam ke haar bikhre haiñ

shafaq kī narm kiran jis pe jhilmilātī hai

shikasta īñToñ pe makḌī ke jaal haiñ jis jā

yahīñ pe dil ko na.e dard se do-chār kiyā

kisī ke paañv kī aahaT kā intizār kiyā

isī udaas khañDar ke udaas Tiile par

ye nahr jis meñ kabhī lahr bhī uThī hogī

jo aaj dīda-e-be-āb-o-nūr hai goyā

jise hubāb ke rañgīn qumqume na mile

bajā.e mauj jahāñ saañp raqs karte the

yahīñ nigāh-e-tamannā ko ashk-bār kiyā

kisī ke paañv kī aahaT kā intizār kiyā

isī udaas khañDar ke udaas Tiile par

muhīb-e-ġhār ke kone pe ye jhukā sā daraḳht

fazā meñ laTkī huī khokhlī jaḌeñ jis kī

ye Tahniyāñ jo havāoñ meñ thartharātī haiñ

batā rahī haiñ ki maazī kī yādgār haiñ ham

unhīñ kī chhāñv meñ shām-e-junūñ se pyaar kiyā

kisī ke paañv kī aahaT kā intizār kiyā

isī udaas khañDar ke udaas Tiile par

isi udas khanDar ke udas Tile par

jahan paDe hain nukile se surmai kankar

jahan ki KHak pe shabnam ke haar bikhre hain

shafaq ki narm kiran jis pe jhilmilati hai

shikasta inTon pe makDi ke jal hain jis ja

yahin pe dil ko nae dard se do-chaar kiya

kisi ke panw ki aahaT ka intizar kiya

isi udas khanDar ke udas Tile par

ye nahr jis mein kabhi lahr bhi uThi hogi

jo aaj dida-e-be-ab-o-nur hai goya

jise hubab ke rangin qumqume na mile

bajae mauj jahan sanp raqs karte the

yahin nigah-e-tamanna ko ashk-bar kiya

kisi ke panw ki aahaT ka intizar kiya

isi udas khanDar ke udas Tile par

muhib-e-ghaar ke kone pe ye jhuka sa daraKHt

faza mein laTki hui khokhli jaDen jis ki

ye Tahniyan jo hawaon mein thartharaati hain

bata rahi hain ki mazi ki yaadgar hain hum

unhin ki chhanw mein sham-e-junun se pyar kiya

kisi ke panw ki aahaT ka intizar kiya

isi udas khanDar ke udas Tile par