KHat

shahr ḳhat likhtā hai

sab se pahle tārīḳh

yaanī jis din ḳhat likhā gayā

jagah yaanī jahāñ se ḳhat likhā gayā

aur phir vaqt

jis vaqt shahr ne ye ḳhat likhnā shurūa kiyā

shāyad vo ro rahā thā

niilī raushnā.ī se likhe ga.e lafz

jagah jagah se phail ga.e haiñ

aur kāġhaz itnā ḳhasta hai ki agar ḳhat ziyāda der Daak meñ rahtā to shāyad

lifāfe ke andar hī kaT phaT jaatā

ḳhat likhne ke daurān hī

shahr ke siine par

Dher saarī goliyāñ dāġhī ga.iiñ

shahr kī āñkhoñ meñ

raakh aur bārūd ke zarre

bhare ga.e

shahr ko der tak dhuup meñ baiThnā paḌā

aur is se bhī ziyāda der

añdheroñ meñ rahnā paḌā

shahr sub.h se dopahar tak

dīvār ke saath lagā

khaḌā rahā

aur Dar ke maare

bahut sī bāteñ likhte likhte rah gayā

shahr vo bāteñ bhūlā nahīñ

us ne likhā hai vo apnī Diary meñ

sab kuchh note kar rahā hai

us ne likhā hai log is Diary ko

churāne kī koshish kar rahe haiñ

us ne likhā vo apnī Diary ek din

shahr na jaane kyā likhnā chāhtā thā

aur likh nahīñ sakā

tiin chauthā.ī ḳhat likhne ke ba.ad

shahr kā kāġhaz shahr kī niilī raushnā.ī

shahr kī siyāhī shahr ke lafz

sab kuchh ḳhatm ho kar rah gayā

shahr us ḳhat ke shurūa meñ

us shaḳhs kā naam likhnā bhuul gayā

jise vo ḳhat likhnā chaah rahā thā

aur ḳhat ḳhatm karne ke ba.ad

yā shāyad is se pahle hī

shahr apnā naam bhī bhuul chukā thā

shahr KHat likhta hai

sab se pahle tariKH

yani jis din KHat likha gaya

jagah yani jahan se KHat likha gaya

aur phir waqt

jis waqt shahr ne ye KHat likhna shurua kiya

shayad wo ro raha tha

nili raushnai se likhe gae lafz

jagah jagah se phail gae hain

aur kaghaz itna KHasta hai ki agar KHat ziyaada der Dak mein rahta to shayad

lifafe ke andar hi kaT phaT jata

KHat likhne ke dauran hi

shahr ke sine par

Dher sari goliyan daghi gain

shahr ki aankhon mein

rakh aur barud ke zarre

bhare gae

shahr ko der tak dhup mein baiThna paDa

aur is se bhi ziyaada der

andheron mein rahna paDa

shahr subh se dopahar tak

diwar ke sath laga

khaDa raha

aur Dar ke mare

bahut si baaten likhte likhte rah gaya

shahr wo baaten bhula nahin

us ne likha hai wo apni Diary mein

sab kuchh note kar raha hai

us ne likha hai log is Diary ko

churane ki koshish kar rahe hain

us ne likha wo apni Diary ek din

shahr na jaane kya likhna chahta tha

aur likh nahin saka

tin chauthai KHat likhne ke baad

shahr ka kaghaz shahr ki nili raushnai

shahr ki siyahi shahr ke lafz

sab kuchh KHatm ho kar rah gaya

shahr us KHat ke shurua mein

us shaKHs ka nam likhna bhul gaya

jise wo KHat likhna chah raha tha

aur KHat KHatm karne ke baad

ya shayad is se pahle hi

shahr apna nam bhi bhul chuka tha