KHauf nama

naaf kaTtī hai zaḳhm jaltā hai

ḳhauf dhaḌkan ke saath chaltā hai

har rag-e-jāñ meñ sarsarātā hai

saañs ke saath aatā jaatā hai

khaal ko chhāl se milātī hai

sansanī rauñgTe banātī hai

tāq-e-jāñ meñ charāġh rakhtā hai

ḳhauf-e-vahshat kā tel chakhtā hai

sajda-e-ġham meñ gir gayā zāhid

sarsarātī jabīñ meñ ḳhauf liye

ho gayā añgbīn se namkīn

zā.iqa āstīñ meñ ḳhauf liye

saañp lashkar ke saath chaltā hai

memana maysara meñ ḳhauf liye

husn ġhamze ke dam se qaa.em hai

apnī har har adā meñ ḳhauf liye

zindagī ek farsh hai jis par

Dar uThā.eñ to haul bichhtā hai

shāhrāh-e-hayat ke uupar

ḳhauf kā tārkol bichhtā hai

maz.hab ījād kartā rahtā hai

mābad ābād kartā rahtā hai

ye to andar kī sañg saarī hai

ḳhauf barbād kartā rahtā hai

fahm o dānish ke zard saudāgar

vasvasoñ kī kapās bechte haiñ

ruuh kī market un kī hai

jo aqīde hirās bechte haiñ

zindagī ham-safar hai lekin ḳhauf

rāste meñ utaar detā hai

parcha-e-jāñ ke har shumāre meñ

vāhima ishtihār detā hai

maut ḳhud mārtī nahīñ jitnā

maut kā ḳhauf maar detā hai

naf kaTti hai zaKHm jalta hai

KHauf dhaDkan ke sath chalta hai

har rag-e-jaan mein sarsaraata hai

sans ke sath aata jata hai

khaal ko chhaal se milati hai

sansani raungTe banati hai

taq-e-jaan mein charagh rakhta hai

KHauf-e-wahshat ka tel chakhta hai

sajda-e-gham mein gir gaya zahid

sarsaraati jabin mein KHauf liye

ho gaya angbin se namkin

zaiqa aastin mein KHauf liye

sanp lashkar ke sath chalta hai

memana maysara mein KHauf liye

husn ghamze ke dam se qaem hai

apni har har ada mein KHauf liye

zindagi ek farsh hai jis par

Dar uThaen to haul bichhta hai

shahrah-e-hayat ke upar

KHauf ka tarkol bichhta hai

mazhab ijad karta rahta hai

mabad aabaad karta rahta hai

ye to andar ki sang sari hai

KHauf barbaad karta rahta hai

fahm o danish ke zard saudagar

waswason ki kapas bechte hain

ruh ki market un ki hai

jo aqide hiras bechte hain

zindagi ham-safar hai lekin KHauf

raste mein utar deta hai

parcha-e-jaan ke har shumare mein

wahima ishtihaar deta hai

maut KHud marti nahin jitna

maut ka KHauf mar deta hai