khiDki andhi ho chuki hai

khiḌkī andhī ho chukī hai

dhuul kī chādar meñ apnā muñh chhupā.e

kaalī saḌkeñ so chukī haiñ

dhuup kī nañgī chuḌeloñ ke sulagte qahqahoñ se

jā-ba-jā peḌoñ ke saa.e jal rahe haiñ

mez par gul-dān meñ hañste hue phūloñ se

mīThe lams kī ḳhushbū kā jharnā bah rahā hai

ek saaya ā.īñe ke kaan meñ kuchh kah rahā hai

ahd-e-rafta kī gilahrī

ḳhūb-sūrat dum uThā.e

roTī ke TukḌe ko dāñtoñ meñ dabā.e bhāgtī hai

ek makḌī

maġhribī kone meñ jaalā bun rahī hai

shahr ḳhālī ho rahā hai

kyā tum apnī zindagī se mutma.in ho?

haañ... nahīñ huuñ

ḳhair jaane do... suno

masjid kā vo būḌhā mo.azzin

ḳhair kī jānib bulātā hai tumheñ

apnā ġham kis se kaheñ

khiDki andhi ho chuki hai

dhul ki chadar mein apna munh chhupae

kali saDken so chuki hain

dhup ki nangi chuDelon ke sulagte qahqahon se

ja-ba-ja peDon ke sae jal rahe hain

mez par gul-dan mein hanste hue phulon se

miThe lams ki KHushbu ka jharna bah raha hai

ek saya aaine ke kan mein kuchh kah raha hai

ahd-e-rafta ki gilahri

KHub-surat dum uThae

roTi ke TukDe ko danton mein dabae bhagti hai

ek makDi

maghribi kone mein jala bun rahi hai

shahr KHali ho raha hai

kya tum apni zindagi se mutmain ho?

han nahin hun

KHair jaane do suno

masjid ka wo buDha moazzin

KHair ki jaanib bulata hai tumhein

apna gham kis se kahen