KHizan ka mausam

zavāl par thī bahār kī rut

ḳhizāñ kā mausam uruuj par thā

udāsiyāñ thiiñ har ek shai par

chaman se shādābiyāñ ḳhafā thiiñ

un hī dinoñ meñ thī maiñ bhī tanhā

udāsī mujh ko bhī Das rahī thī

vo girte pattoñ kī sūkhī aahaT

ye sahrā sahrā bikhartī hālat

hamī ko merī kuchal rahī thī

maiñ lamha lamha sulag rahī thī

mujhe ye irfān ho gayā thā

haqīqat apnī bhī khul rahī thī

ki zaat apnī hai yuuñ hī faanī

jo ek jhaTkā ḳhizāñ kā aa.e

to zindagī kā shajar bhī is pul

ḳhamosh-o-tanhā khaḌā milegā

mizāj aur ḳhush-ravī ke patte

diloñ meñ logoñ ke misl-e-sahrā

phireñge maare ye yaad ban kar

kuchh hī dinoñ tak

magar muqaddar hai un kā faanī

ke laakh patte ye shor kar leñ

mizāj meñ sar-kashī bhī rakh leñ

yā girya kar leñ udaas ho leñ

to farq use ye bas paḌegā

zamīn un ko sameT legī

zarā sī phir ye jagah bhī degī

karishma qudrat kā hai ye aisā

uruuj par hai zavāl apnā

har ek ko hai palaT ke jaanā

zawal par thi bahaar ki rut

KHizan ka mausam uruj par tha

udasiyan thin har ek shai par

chaman se shadabiyan KHafa thin

un hi dinon mein thi main bhi tanha

udasi mujh ko bhi Das rahi thi

wo girte patton ki sukhi aahaT

ye sahra sahra bikharti haalat

hami ko meri kuchal rahi thi

main lamha lamha sulag rahi thi

mujhe ye irfan ho gaya tha

haqiqat apni bhi khul rahi thi

ki zat apni hai yun hi fani

jo ek jhaTka KHizan ka aae

to zindagi ka shajar bhi is pul

KHamosh-o-tanha khaDa milega

mizaj aur KHush-rawi ke patte

dilon mein logon ke misl-e-sahra

phirenge mare ye yaad ban kar

kuchh hi dinon tak

magar muqaddar hai un ka fani

ke lakh patte ye shor kar len

mizaj mein sar-kashi bhi rakh len

ya girya kar len udas ho len

to farq use ye bas paDega

zamin un ko sameT legi

zara si phir ye jagah bhi degi

karishma qudrat ka hai ye aisa

uruj par hai zawal apna

har ek ko hai palaT ke jaana