KHud-kushi

haañ maiñ ne bhī sunā hai tumhāre paḌos meñ

kal raat ek hādsa-e-qatl ho gayā

haañ maiñ ne bhī sunā hai ki ik jaam zahr kā

do jīvanoñ kī nannhī sī naukā Dubo gayā

koī dukhī javān vatan apnā chhoḌ kar

apnī sakhī ke saath ik aur des ko gayā

duniyā ke ḳhārzār meñ sau Thokaroñ ke ba.ad

yuuñ āḳhir un kā qissa-e-ġham ḳhatm ho gayā

yuuñ tai kiyā unhoñ ne mohabbat kā marhala

ek ek ghoñT aur jo honā thā ho gayā

donoñ kī aañkh meñ thā ik ik ashk munjamid

jo ḳhushk ḳhushk palkoñ kī nokeñ bhigo gayā

kuchh kahne paa.ī thī ki vo ḳhāmosh ho ga.ī

koī javāb dene ko thā vo ki so gayā

paimāna-e-ajal kā vo talḳhāba is tarah

rūhoñ ke zaḳhmoñ sīnoñ ke dāġhoñ ko dho gayā

aksar yūñhī huā hai ki ulfat kā imtihāñ

dushvāriyoñ meñ maut kī āsān ho gayā

aao nā ham bhī toḌ deñ is dām-e-zīst ko

sañg-e-ajal pe phoḌ deñ is jām-e-zīst ko

han main ne bhi suna hai tumhaare paDos mein

kal raat ek hadsa-e-qatl ho gaya

han main ne bhi suna hai ki ek jam zahr ka

do jiwanon ki nannhi si nauka Dubo gaya

koi dukhi jawan watan apna chhoD kar

apni sakhi ke sath ek aur des ko gaya

duniya ke KHarzar mein sau Thokaron ke baad

yun aaKHir un ka qissa-e-gham KHatm ho gaya

yun tai kiya unhon ne mohabbat ka marhala

ek ek ghonT aur jo hona tha ho gaya

donon ki aankh mein tha ek ek ashk munjamid

jo KHushk KHushk palkon ki noken bhigo gaya

kuchh kahne pai thi ki wo KHamosh ho gai

koi jawab dene ko tha wo ki so gaya

paimana-e-ajal ka wo talKHaba is tarah

ruhon ke zaKHmon sinon ke daghon ko dho gaya

aksar yunhi hua hai ki ulfat ka imtihan

dushwariyon mein maut ki aasan ho gaya

aao na hum bhi toD den is dam-e-zist ko

sang-e-ajal pe phoD den is jam-e-zist ko