KHud-supurdagi

raat bhīge to purāne qisse

pa.e tartīb koī aur sahārā DhūñDeñ

chāñdnī niiñd kā phailā huā jaadū le kar

dil ke be-ḳhvāb nagar meñ utre

aur havā dhuup se baulā.ī huī saḌkoñ par

loriyāñ gaatī nikle

os har phuul ke dāman meñ sitāre bhar de

lekin is ḳhvāb-e-ḳhayālī kā natīja kyā hai

raat kī god mire dard kī manzil to nahīñ

dāman-e-gul pe chamaktī shabnam

loriyāñ detī huī sard havā

chāñdī kī narm sunahrī kirneñ

sab ke sīnoñ meñ utar jā.eñgī

kal ke sūraj kī jhulastī kirneñ

dard phir ḳhāk-ba-sar aa.egā

ḳhvāb kī aañkh meñ simTā huā saarā kājal

ḳhud usī ḳhvāb ke chehre pe bikhar jā.egā

dil ke qissoñ kā muqaddar hai pareshāñ-hālī

pa.e tartīb sahāroñ kā ta.āqub chhoḌo

soch ke baḳht meñ iz.hār kā lamha kab thā

dil-e-nākām sarāboñ kā ta.āqub chhoḌo

sub.h-dam phir vahī putlī kā tamāshā hogā

jāgtī raat ke ḳhvāboñ kā ta.āqub chhoḌo

raat bhige to purane qisse

pae tartib koi aur sahaara DhunDen

chandni nind ka phaila hua jadu le kar

dil ke be-KHwab nagar mein utre

aur hawa dhup se baulai hui saDkon par

loriyan gati nikle

os har phul ke daman mein sitare bhar de

lekin is KHwab-e-KHayali ka natija kya hai

raat ki god mere dard ki manzil to nahin

daman-e-gul pe chamakti shabnam

loriyan deti hui sard hawa

chandi ki narm sunahri kirnen

sab ke sinon mein utar jaengi

kal ke suraj ki jhulasti kirnen

dard phir KHak-ba-sar aaega

KHwab ki aankh mein simTa hua sara kajal

KHud usi KHwab ke chehre pe bikhar jaega

dil ke qisson ka muqaddar hai pareshan-haali

pae tartib sahaaron ka taaqub chhoDo

soch ke baKHt mein izhaar ka lamha kab tha

dil-e-nakaam sarabon ka taaqub chhoDo

subh-dam phir wahi putli ka tamasha hoga

jagti raat ke KHwabon ka taaqub chhoDo