KHuda-e-bartar teri zamin par zamin ki KHatir ye jang kyun hai

ḳhudā-e-bartar tirī zamīñ par zamīñ kī ḳhātir ye jañg kyuuñ hai

har ek fat.h-o-zafar ke dāman pe ḳhūn-e-insān kā rañg kyuuñ hai

zamīñ bhī terī hai ham bhī tere ye milkiyat kā savāl kyā hai

ye qatl-o-ḳhūñ kā rivāj kyuuñ hai ye rasm-e-jañg-o-jidāl kyā hai

jinheñ talab hai jahān bhar kī unhīñ kā dil itnā tañg kyuuñ hai

ḳhudā-e-bartar terī zamīñ par zamīñ kī ḳhātir ye jañg kyuuñ hai

ġharīb maaoñ sharīf bahnoñ ko aman-o-izzat kī zindagī de

jinheñ atā kī hai tū ne tāqat unheñ hidāyat kī raushnī de

suroñ meñ kibr-o-ġhurūr kyuuñ hai diloñ ke shīshe ye rañg kyuuñ hai

ḳhudā-e-bartar tirī zamīñ par zamīñ kī ḳhātir ye jañg kyuuñ hai

KHuda-e-bartar teri zamin par zamin ki KHatir ye jang kyun hai

har ek fath-o-zafar ke daman pe KHun-e-insan ka rang kyun hai

zamin bhi teri hai hum bhi tere ye milkiyat ka sawal kya hai

ye qatl-o-KHun ka riwaj kyun hai ye rasm-e-jang-o-jidal kya hai

jinhen talab hai jahan bhar ki unhin ka dil itna tang kyun hai

KHuda-e-bartar teri zamin par zamin ki KHatir ye jang kyun hai

gharib maon sharif bahnon ko aman-o-izzat ki zindagi de

jinhen ata ki hai tu ne taqat unhen hidayat ki raushni de

suron mein kibr-o-ghurur kyun hai dilon ke shishe ye rang kyun hai

KHuda-e-bartar teri zamin par zamin ki KHatir ye jang kyun hai