KHuda wo waqt na lae

ḳhudā vo vaqt na laa.e ki sogvār ho tū

sakūñ kī niiñd tujhe bhī harām ho jaa.e

tirī masarrat-e-paiham tamām ho jaa.e

tirī hayāt tujhe talḳh jaam ho jaa.e

ġhamoñ se ā.īna-e-dil gudāz ho terā

hujūm-e-yās se betāb ho ke rah jaa.e

vufūr-e-dard se sīmāb hoke rah jaa.e

tirā shabāb faqat ḳhvāb ho ke rah jaa.e

ġhurūr-e-husn sarāpā niyāz ho terā

tavīl rātoñ meñ tū bhī qarār ko tarse

tirī nigāh kisī ġham-gusār ko tarse

ḳhizāñ-rasīda tamannā bahār ko tarse

koī jabīñ na tire sañg-e-āstāñ pe jhuke

ki jins-e-ijz-o-aqīdat se tujh ko shaad kare

fareb-e-vāda-e-fardā pe e'timād kare

ḳhudā vo vaqt na laa.e ki tujh ko yaad aa.e

vo dil ki tere liye be-qarār ab bhī hai

vo aañkh jis ko tirā intizār ab bhī hai

KHuda wo waqt na lae ki sogwar ho tu

sakun ki nind tujhe bhi haram ho jae

teri masarrat-e-paiham tamam ho jae

teri hayat tujhe talKH jam ho jae

ghamon se aaina-e-dil gudaz ho tera

hujum-e-yas se betab ho ke rah jae

wufur-e-dard se simab hoke rah jae

tera shabab faqat KHwab ho ke rah jae

ghurur-e-husn sarapa niyaz ho tera

tawil raaton mein tu bhi qarar ko tarse

teri nigah kisi gham-gusar ko tarse

KHizan-rasida tamanna bahaar ko tarse

koi jabin na tere sang-e-astan pe jhuke

ki jins-e-ijz-o-aqidat se tujh ko shad kare

fareb-e-wada-e-farda pe e'timad kare

KHuda wo waqt na lae ki tujh ko yaad aae

wo dil ki tere liye be-qarar ab bhi hai

wo aankh jis ko tera intizar ab bhi hai