KHuda zamin par kab aaega

kā.enāt jis kī bāgeñ

kisī hādse ke haath meñ de kar

ḳhudā-vand-e-karīm ibādateñ baTor rahā hai

kyā use sirf yahī ġharaz hai

ki vo pahchānā jaa.e yā

us ke hone kī

kuchh aur bhī haqīqat hai

is mulk meñ jahāñ ba-zāhir āzādī hai

ġhulāmī ke tauq pahne hue eḌiyāñ ragaḌtī dil masostī jāñ-ba-lab zindagī

umr kā tavīl safar tai karne kahāñ jā.egī

kyā koī aur zindagī-baḳhsh sayyāra daryāft ho chukā hai

kyā koī aur zamīn DhūñD lī ga.ī hai

itnī baḌī duniyā meñ kyā chhoTe-pan ko dafn karne kī koī jagah baaqī nahīñ

kyā samundaroñ ne iqrār kar liyā hai ki vo murdār nigleñge

aur kashtiyoñ ko bandar-gāhoñ ke kināroñ par pahuñchā kar qazzāqoñ ke havāle kar deñge

aañkh jab patthar barsāne lagegī to āñsū-bhar ḳhajālat

māthe se numūdār ho kar apne hone kā ehsās dilā.eñ ge

is āzād mulk meñ jahāñ ġhulāmī ke tauq pahne

eḌiyāñ ragaḌtī dil masostī jāñ-ba-lab zindagī intizār meñ hai

ki ibādateñ baTortā ḳhudā kā.enāt kī sīḌhiyoñ tak to aa.e

kaenat jis ki bagen

kisi hadse ke hath mein de kar

KHuda-wand-e-karim ibaadaten baTor raha hai

kya use sirf yahi gharaz hai

ki wo pahchana jae ya

us ke hone ki

kuchh aur bhi haqiqat hai

is mulk mein jahan ba-zahir aazadi hai

ghulami ke tauq pahne hue eDiyan ragaDti dil masosti jaan-ba-lab zindagi

umr ka tawil safar tai karne kahan jaegi

kya koi aur zindagi-baKHsh sayyara daryaft ho chuka hai

kya koi aur zamin DhunD li gai hai

itni baDi duniya mein kya chhoTe-pan ko dafn karne ki koi jagah baqi nahin

kya samundaron ne iqrar kar liya hai ki wo murdar niglenge

aur kashtiyon ko bandar-gahon ke kinaron par pahuncha kar qazzaqon ke hawale kar denge

aankh jab patthar barsane lagegi to aansu-bhar KHajalat

mathe se numudar ho kar apne hone ka ehsas dilaen ge

is aazad mulk mein jahan ghulami ke tauq pahne

eDiyan ragaDti dil masosti jaan-ba-lab zindagi intizar mein hai

ki ibaadaten baTorta KHuda kaenat ki siDhiyon tak to aae