KHush-amdid

aaj is bazm meñ aa.e ho baḌī dhuum ke saath

be-ḳhudī mahv-e-nazāra hai tumhārī ḳhātir

yaad aate haiñ vo ayyām-e-judā.ī ham ko

jinheñ hañs hañs ke guzārā hai tumhārī ḳhātir

go mai-e-lutf se ḳhālī nahīñ pindār-e-junūñ

yaañ ġham-e-ishq kā yaarā hai tumhārī ḳhātir

ranj uThānā to koī baat nahīñ hai lekin

zahr piinā bhī gavārā hai tumhārī ḳhātir

haar aur jiit ke mafhūm meñ kyā rakkhā hai

jiit kar bhī koī haarā hai tumhārī ḳhātir

turk-e-shīrāz ho tum hafiz-e-shīrāz huuñ maiñ

ab samarqand-o-buḳhārā hai tumhārī ḳhātir

tum jo aa.e ho to is ziist kī lazzat pā kar

ham ne aalam ko sañvārā hai tumhārī ḳhātir

aaj ham ne mah-o-anjum ko bhī zahmat dī hai

āsmānoñ se utārā hai tumhārī ḳhātir

lāla-o-gul ko bahāroñ ko saman-zāroñ ko

dīda-o-dil ne pukārā hai tumhārī ḳhātir

phir yahāñ shīsha-o-sāġhar se charāġhāñ hogā

phir koī anjuman-ārā hai tumhārī ḳhātir

aaj is bazm mein aae ho baDi dhum ke sath

be-KHudi mahw-e-nazara hai tumhaari KHatir

yaad aate hain wo ayyam-e-judai hum ko

jinhen hans hans ke guzara hai tumhaari KHatir

go mai-e-lutf se KHali nahin pindar-e-junun

yan gham-e-ishq ka yara hai tumhaari KHatir

ranj uThana to koi baat nahin hai lekin

zahr pina bhi gawara hai tumhaari KHatir

haar aur jit ke mafhum mein kya rakkha hai

jit kar bhi koi haara hai tumhaari KHatir

turk-e-shiraaz ho tum hafiz-e-shiraaz hun main

ab samarqand-o-buKHara hai tumhaari KHatir

tum jo aae ho to is zist ki lazzat pa kar

hum ne aalam ko sanwara hai tumhaari KHatir

aaj hum ne mah-o-anjum ko bhi zahmat di hai

aasmanon se utara hai tumhaari KHatir

lala-o-gul ko bahaaron ko saman-zaron ko

dida-o-dil ne pukara hai tumhaari KHatir

phir yahan shisha-o-saghar se charaghan hoga

phir koi anjuman-ara hai tumhaari KHatir