KHush-KHurak

ḳhush haiñ aise log duniyā meñ jo ḳhush-ḳhūrāk haiñ

aur un logoñ ke dastar-ḳhvān haibatnāk haiñ

un ke dastar-ḳhvān pe ḳhushbū misālī chaa.e kī

chaar anDe chhe slice das piyālī chaa.e kī

ho ga.e jab chaa.e kī lazzat se dil-bardashta

khā liye aadhā kilo añgūr ba.ad-az-nāshta

jab kahīñ mauqa.a milā thoḌā sā biscuit khā liyā

nosh-e-jāñ farmā liyā phir paan cigarette chhāliyā

dopahar meñ chhe chapātī chaar anDe omelette

chār-chhe shāmī kabāb aur ik nahārī ke plate

kofte hasb-e-liyāqat ek lassī kā gilass

khā ga.e aur pī ga.e mausūf be-ḳhauf-o-hirās

da.avatoñ ke jaal phailā.e hue haiñ har taraf

kah diyā khāne se pahle hī takalluf-bar-taraf

raat ko thoḌī sī jelly kuchh murbba aam kā

kuchh papītā le liyā phir hāzme ke naam kā

do parāThe le liye kuchh der sustāne ke ba.ad

''ik tire aane se pahle ik tire jaane ke ba.ad''

KHush hain aise log duniya mein jo KHush-KHurak hain

aur un logon ke dastar-KHwan haibatnak hain

un ke dastar-KHwan pe KHushbu misali chae ki

chaar anDe chhe slice das piyali chae ki

ho gae jab chae ki lazzat se dil-bardashta

kha liye aadha kilo angur baad-az-nashta

jab kahin mauqa mila thoDa sa biscuit kha liya

nosh-e-jaan farma liya phir pan cigarette chhaaliya

dopahar mein chhe chapati chaar anDe omelette

chaar-chhe shami kabab aur ek nahaari ke plate

kofte hasb-e-liyaqat ek lassi ka gilass

kha gae aur pi gae mausuf be-KHauf-o-hiras

dawaton ke jal phailae hue hain har taraf

kah diya khane se pahle hi takalluf-bar-taraf

raat ko thoDi si jelly kuchh murbba aam ka

kuchh papita le liya phir hazme ke nam ka

do paraThe le liye kuchh der sustane ke baad

ik tere aane se pahle ek tere jaane ke baad