KHusha zamanat-e-gham

dayār-e-yār tirī joshish-e-junūñ pe salām

mire vatan tire dāmān-e-tār-tār kī ḳhair

rah-e-yaqīñ tirī afshān-e-ḳhak-o-ḳhūñ pe salām

mire chaman tire zaḳhmoñ ke lāla-zār kī ḳhair

har ek ḳhāna-e-vīrāñ kī tīrgī pe salām

har ek ḳhāk-basar, ḳhānumāñ-ḳharāb kī ḳhair

har ek kushta-e-nā-haq kī ḳhāmushī pe salām

har ek dīda-e-pur-nam kī āb-o-tāb kī ḳhair

ravāñ rahe ye rivāyat, ḳhushā zamānat-e-ġham

nashāt-e-ḳhatm-e-ġham-e-kā.enāt se pahle

har ik ke saath rahe daulat-e-amānat-e-ġham

koī najāt na paa.e najāt se pahle

sakūñ mile na kabhī tere pā-figāroñ ko

jamāl-e-ḳhūn-e-sar-e-ḳhār ko nazar na lage

amaañ mile na kahīñ tere jāñ-nisāroñ ko

jalāl-e-farq-e-sar-e-dār ko nazar na lage

dayar-e-yar teri joshish-e-junun pe salam

mere watan tere daman-e-tar-tar ki KHair

rah-e-yaqin teri afshan-e-KHak-o-KHun pe salam

mere chaman tere zaKHmon ke lala-zar ki KHair

har ek KHana-e-viran ki tirgi pe salam

har ek KHak-basar, KHanuman-KHarab ki KHair

har ek kushta-e-na-haq ki KHamushi pe salam

har ek dida-e-pur-nam ki aab-o-tab ki KHair

rawan rahe ye riwayat, KHusha zamanat-e-gham

nashat-e-KHatm-e-gham-e-kaenat se pahle

har ek ke sath rahe daulat-e-amanat-e-gham

koi najat na pae najat se pahle

sakun mile na kabhi tere pa-figaron ko

jamal-e-KHun-e-sar-e-KHar ko nazar na lage

aman mile na kahin tere jaan-nisaron ko

jalal-e-farq-e-sar-e-dar ko nazar na lage