KHushamad

dil ḳhushāmad se har ik shaḳhs kā kyā raazī hai

aadmī jin parī o bhuut balā raazī hai

bhaa.ī farzand bhī ḳhush baap chachā raazī hai

shaad masrūr ġhanī shaah o gadā raazī hai

jo ḳhushāmad kare ḳhalq us se sadā raazī hai

haq to ye hai ki ḳhushāmad se ḳhudā raazī hai

apnā matlab ho to matlab kī ḳhushāmad kiije

aur na ho kaam to us Dhab kī ḳhushāmad kiije

auliyā ambiyā aur rab kī ḳhushāmad kiije

apne maqdūr ġharaz sab kī ḳhushāmad kiije

jo ḳhushāmad kare ḳhalq us se sadā raazī hai

haq to ye hai kī ḳhushāmad se ḳhudā raazī hai

chaar din jis ko kiyā jhuk ke ḳhushāmad se salām

vo bhī ḳhush ho gayā apnā bhī huā kaam meñ kaam

baḌe aaqil baḌe daanā ne nikālā hai ye daam

ḳhuub dekhā to ḳhushāmad hī kī aamad hai tamām

jo ḳhushāmad kare ḳhalq us se sadā raazī hai

haq to ye hai ki ḳhushāmad se ḳhudā raazī hai

bad baḳhīl aur saḳhī kī bhī ḳhushāmad kiije

aur jo shaitān ho to us kī bhī ḳhushāmad kiije

gar valī ho to valī kī bhī ḳhushāmad kiije

jo ḳhushāmad kare ḳhalq us se sadā raazī hai

haq to ye hai ki ḳhushāmad se ḳhudā raazī hai

pyaar se joḌ diye jis kī taraf haath jo aah

vahīñ ḳhush ho gayā karte hī vo hāthoñ pe nigāh

ġhaur se ham ne jo is baat ko dekhā vallāh

kuchh ḳhushāmad hī baḌī chiiz hai allāh allāh

jo ḳhushāmad kare ḳhalq us se sadā raazī hai

haq to ye hai ki ḳhushāmad se ḳhudā raazī

piine aur pahanñe khāne kī ḳhushāmad kiije

hījḌe bhāñD zanāne kī ḳhushāmad kiije

mast o hushiyār divāne kī ḳhushāmad kiije

bhole nādān siyāne kī ḳhushāmad kiije

jau ḳhushāmad kare ḳhalq us se sadā raazī hai

haq to ye hai ki ḳhushāmad se ḳhudā raazī hai

aish karte haiñ vahī jin kā ḳhushāmad kā mizāj

jo nahīñ karte vo rahte haiñ hamesha mohtāj

haath aatā hai ḳhushāmad se makāñ mulk aur taaj

kyā hī tāsīr kī is nusḳhe ne paa.ī hai rivāj

jo ḳhushāmad kare ḳhalq us se sadā raazī hai

haq to ye ki ḳhushāmad se ḳhudā raazī hai

gar bhalā ho to bhale kī bhī ḳhushāmad kiije

aur burā ho to bure kī bhī ḳhushāmad kiije

paak nāpāk siḌe kī bhī ḳhushāmad kiije

kutte billī o gad.he kī bhī ḳhushāmad kiije

jo ḳhushāmad kare ḳhalq us se sadā raazī hai

haq to ye ki ḳhushāmad se ḳhudā raazī hai

ḳhuub dekhā to ḳhushāmad kī baḌī khetī hai

ġhair kī apne hī ghar biich ye sukh detī hai

maañ ḳhushāmad ke sabab chhātī lagā letī hai

naanī daadī bhī ḳhushāmad se duā detī hai

jo ḳhushāmad kare ḳhalq us se sadā raazī hai

haq to ye ki ḳhushāmad se ḳhudā raazī hai

bī-bī kahtī hai miyāñ aa tire sadqe jā.ūñ

saas bole kahīñ mat jā tire sadqe jā.ūñ

ḳhāla kahtī hai ki kuchh khā tire sadqe jā.ūñ

saalī kahtī hai ki bhayyā tire sadqe jā.ūñ

jo ḳhushāmad kare ḳhalq us se sadā raazī hai

haq to ye ki ḳhushāmad se ḳhudā raazī hai

aa paḌā hai jo ḳhushāmad se sarokār use

DhūñDte phirte haiñ ulfat ke ḳharīdār use

āshnā milte haiñ aur chāhe haiñ sab yaar use

apne begāne ġharaz karte haiñ sab pyaar use

jo ḳhushāmad kare ḳhalq us se sadā raazī hai

haq to ye ki ḳhushāmad se ḳhudā raazī hai

rūkhī aur roġhnī aabī ko ḳhushāmad kiije

nān-bā.ī o kabābī kī ḳhushāmad kiije

saaqī o jaam sharābī kī ḳhushāmad kiije

pārsā rind ḳharābī kī ḳhushāmad kiije

jo ḳhushāmad kare ḳhalq us se sadā arāzī hai

haq to ye hai ki ḳhushāmad se ḳhudā raazī hai

jo ki karte haiñ ḳhushāmad vo baḌe haiñ insāñ

jo nahīñ karte vo rahte haiñ hamesha hairāñ

haath aate haiñ ḳhushāmad se hazāroñ sāmāñ

jis ne ye baat nikālī hai maiñ us ke qurbāñ

jo ḳhushāmad kare ḳhalq us se sadā raazī hai

haq to ye hai ki ḳhushāmad se ḳhudā raazī hai

kauḌī paise o Take zar kī ḳhushāmad kiije

la.al o nīlam dar o gauhar kī ḳhushāmad kiije

aur jo patthar ho to patthar kī ḳhushāmad kiije

nek o bad jitne haiñ yak-sar kī ḳhushāmad kiije

jo ḳhushāmad kare ḳhalq us se sadā raazī hai

haq to ye hai ki ḳhushāmad se ḳhudā raazī hai

ham ne har dil kī ḳhushāmad kī mohabbat dekhī

pyaar iḳhlās o karam mehr muravvat dekhī

dilbaroñ meñ bhī ḳhushāmad hī kī ulfat dekhī

āshiqoñ maiñ bhī ḳhushāmad hī kī chāhat dekhī

jo ḳhushāmad kare ḳhalq us se sadā raazī hai

haq to ye hai ki ḳhushāmad se ḳhudā raazī hai

pārsā piir hai zāhid hai manā jaatī hai

juvāriyā chor daġhābāz ḳharābātī hai

maah se maahī talak chyūñTī hai yā hāthī hai

ye ḳhushāmad to miyāñ sab ke ta.iiñ bhātī hai

jo ḳhushāmad kare ḳhalq us se sadā raazī hai

haq to ye hai ki ḳhushāmad se ḳhudā raazī hai

gar na mīThī ho to kaḌvī bhī ḳhushāmad kiije

kuchh na ho paas to ḳhālī bhī ḳhushāmad kiije

jaanī dushman ho to us kī ḳhushāmad kiije

sach agar pūchho to jhūTī bhī ḳhushāmad kiije

jo ḳhushāmad kare ḳhalq us se sadā raazī hai

haq to ye hai ki ḳhushāmad se ḳhudā raazī hai

mard o zan tifl o javāñ ḳhurd o kalāñ piir o faqīr

jitne aalam meñ haiñ mohtāj o gadā shaah vazīr

sab ke dil hote haiñ phande meñ ḳhushāmad ke asiir

to bhī vallāh baḌī baat ye kahtā hai 'nazīr'

jo ḳhushāmad kare ḳhalq us se sadā raazī hai

haq to ye hai ki ḳhushāmad se ḳhudā raazī hai

dil KHushamad se har ek shaKHs ka kya raazi hai

aadmi jin pari o bhut bala raazi hai

bhai farzand bhi KHush bap chacha raazi hai

shad masrur ghani shah o gada raazi hai

jo KHushamad kare KHalq us se sada raazi hai

haq to ye hai ki KHushamad se KHuda raazi hai

apna matlab ho to matlab ki KHushamad kije

aur na ho kaam to us Dhab ki KHushamad kije

auliya ambiya aur rab ki KHushamad kije

apne maqdur gharaz sab ki KHushamad kije

jo KHushamad kare KHalq us se sada raazi hai

haq to ye hai ki KHushamad se KHuda raazi hai

chaar din jis ko kiya jhuk ke KHushamad se salam

wo bhi KHush ho gaya apna bhi hua kaam mein kaam

baDe aaqil baDe dana ne nikala hai ye dam

KHub dekha to KHushamad hi ki aamad hai tamam

jo KHushamad kare KHalq us se sada raazi hai

haq to ye hai ki KHushamad se KHuda raazi hai

bad baKHil aur saKHi ki bhi KHushamad kije

aur jo shaitan ho to us ki bhi KHushamad kije

gar wali ho to wali ki bhi KHushamad kije

jo KHushamad kare KHalq us se sada raazi hai

haq to ye hai ki KHushamad se KHuda raazi hai

pyar se joD diye jis ki taraf hath jo aah

wahin KHush ho gaya karte hi wo hathon pe nigah

ghaur se hum ne jo is baat ko dekha wallah

kuchh KHushamad hi baDi chiz hai allah allah

jo KHushamad kare KHalq us se sada raazi hai

haq to ye hai ki KHushamad se KHuda raazi

pine aur pahanne khane ki KHushamad kije

hijDe bhanD zanane ki KHushamad kije

mast o hushiyar diwane ki KHushamad kije

bhole nadan siyane ki KHushamad kije

jau KHushamad kare KHalq us se sada raazi hai

haq to ye hai ki KHushamad se KHuda raazi hai

aish karte hain wahi jin ka KHushamad ka mizaj

jo nahin karte wo rahte hain hamesha mohtaj

hath aata hai KHushamad se makan mulk aur taj

kya hi tasir ki is nusKHe ne pai hai riwaj

jo KHushamad kare KHalq us se sada raazi hai

haq to ye ki KHushamad se KHuda raazi hai

gar bhala ho to bhale ki bhi KHushamad kije

aur bura ho to bure ki bhi KHushamad kije

pak napak siDe ki bhi KHushamad kije

kutte billi o gadhe ki bhi KHushamad kije

jo KHushamad kare KHalq us se sada raazi hai

haq to ye ki KHushamad se KHuda raazi hai

KHub dekha to KHushamad ki baDi kheti hai

ghair ki apne hi ghar bich ye sukh deti hai

man KHushamad ke sabab chhati laga leti hai

nani dadi bhi KHushamad se dua deti hai

jo KHushamad kare KHalq us se sada raazi hai

haq to ye ki KHushamad se KHuda raazi hai

bi-bi kahti hai miyan aa tere sadqe jaun

sas bole kahin mat ja tere sadqe jaun

KHala kahti hai ki kuchh kha tere sadqe jaun

sali kahti hai ki bhayya tere sadqe jaun

jo KHushamad kare KHalq us se sada raazi hai

haq to ye ki KHushamad se KHuda raazi hai

aa paDa hai jo KHushamad se sarokar use

DhunDte phirte hain ulfat ke KHaridar use

aashna milte hain aur chahe hain sab yar use

apne begane gharaz karte hain sab pyar use

jo KHushamad kare KHalq us se sada raazi hai

haq to ye ki KHushamad se KHuda raazi hai

rukhi aur roghni aabi ko KHushamad kije

nan-bai o kababi ki KHushamad kije

saqi o jam sharabi ki KHushamad kije

parsa rind KHarabi ki KHushamad kije

jo KHushamad kare KHalq us se sada araazi hai

haq to ye hai ki KHushamad se KHuda raazi hai

jo ki karte hain KHushamad wo baDe hain insan

jo nahin karte wo rahte hain hamesha hairan

hath aate hain KHushamad se hazaron saman

jis ne ye baat nikali hai main us ke qurban

jo KHushamad kare KHalq us se sada raazi hai

haq to ye hai ki KHushamad se KHuda raazi hai

kauDi paise o Take zar ki KHushamad kije

lal o nilam dar o gauhar ki KHushamad kije

aur jo patthar ho to patthar ki KHushamad kije

nek o bad jitne hain yak-sar ki KHushamad kije

jo KHushamad kare KHalq us se sada raazi hai

haq to ye hai ki KHushamad se KHuda raazi hai

hum ne har dil ki KHushamad ki mohabbat dekhi

pyar iKHlas o karam mehr murawwat dekhi

dilbaron mein bhi KHushamad hi ki ulfat dekhi

aashiqon main bhi KHushamad hi ki chahat dekhi

jo KHushamad kare KHalq us se sada raazi hai

haq to ye hai ki KHushamad se KHuda raazi hai

parsa pir hai zahid hai mana jati hai

juwariya chor daghabaz KHarabaati hai

mah se mahi talak chyunTi hai ya hathi hai

ye KHushamad to miyan sab ke tain bhati hai

jo KHushamad kare KHalq us se sada raazi hai

haq to ye hai ki KHushamad se KHuda raazi hai

gar na miThi ho to kaDwi bhi KHushamad kije

kuchh na ho pas to KHali bhi KHushamad kije

jaani dushman ho to us ki KHushamad kije

sach agar puchho to jhuTi bhi KHushamad kije

jo KHushamad kare KHalq us se sada raazi hai

haq to ye hai ki KHushamad se KHuda raazi hai

mard o zan tifl o jawan KHurd o kalan pir o faqir

jitne aalam mein hain mohtaj o gada shah wazir

sab ke dil hote hain phande mein KHushamad ke asir

to bhi wallah baDi baat ye kahta hai 'nazir'

jo KHushamad kare KHalq us se sada raazi hai

haq to ye hai ki KHushamad se KHuda raazi hai