KHushbu

tire lams-e-dast-e-hasīñ kī

dil-āvez ḳhushbū

tirī uñgliyoñ se

mirī uñgliyoñ meñ guzartī huī jab

hathelī meñ utrī to maiñ ne

use dast-e-tishna

meñ kuchh is tarah se sameTā

ki mahfūz kar lūñgā shāyad abad tak

maiñ apne liye sirf apne liye

terā husn-e-shagufta jamāl-e-daraḳhshāñ

gumāñ se hasīñ ḳhvāb tak maiñ

ne mahsūs tujh ko kiyā paañv se sar talak ho gayā maiñ munavvar

kaf-e-ārzū kholtā huuñ

tujhe aaj āzād kartā huuñ bū-e-farozāñ

havāoñ meñ niilī fazāoñ meñ uḌtī phiro āsmānoñ ko chhū lo

sitāroñ pe utro

‘anāsir ko bāhoñ meñ le lo

ki ḳhushbū ho tum rang ho raushnī ho

sar-e-mausam-e-gul

sañvartī huī kaif-e-jashn-e-adā meñ

na.ī zindagī ho

tere lams-e-dast-e-hasin ki

dil-awez KHushbu

teri ungliyon se

meri ungliyon mein guzarti hui jab

hatheli mein utri to main ne

use dast-e-tishna

mein kuchh is tarah se sameTa

ki mahfuz kar lunga shayad abad tak

main apne liye sirf apne liye

tera husn-e-shagufta jamal-e-daraKHshan

guman se hasin KHwab tak main

ne mahsus tujh ko kiya panw se sar talak ho gaya main munawwar

kaf-e-arzu kholta hun

tujhe aaj aazad karta hun bu-e-farozan

hawaon mein nili fazaon mein uDti phiro aasmanon ko chhu lo

sitaron pe utro

‘anasir ko bahon mein le lo

ki KHushbu ho tum rang ho raushni ho

sar-e-mausam-e-gul

sanwarti hui kaif-e-jashn-e-ada mein

nai zindagi ho