KHushk-sali

ai dil-e-afsurda vo asrār-e-bātin kyā hue

soz kī rāteñ kahāñ haiñ saaz ke din kyā hue

āñsuoñ kī vo jhaḌī vo ġham kā sāmāñ kyā huā

terā sāvan kā mahīna chashm-e-giryāñ kyā huā

kyā huī bālā-e-sar vo lutf-e-yazdāñ kī ghaTā

āsmān-e-dil pe vo ghanghor irfāñ kī ghaTā

ab vo nāloñ kī garaj hai ab na vo shor-e-fuġhāñ

ab na uThtā hai kaleja se mohabbat kā dhuāñ

apne af.āl-e-siyah par ab pashemānī nahīñ

ab pasīne ke sitāre zeb-e-peshānī nahīñ

dard kī muddat se ab dil meñ chamak hotī nahīñ

vo tapak chhāloñ kī kauñde kī lapak hotī nahīñ

zikr-e-maulā se laboñ par ab vo narmī hī nahīñ

bhaap siine se uThe kyā dil meñ garmī hī nahīñ

ab sharāre soz-e-ġham ke dil meñ rahte hī nahīñ

ashk ab pichhle pahar āñkhoñ se bahte hī nahīñ

ma.arifat dil meñ na ab vo ruuh meñ ehsās hai

log kahte haiñ ki hai lekin hameñ to yaas hai

ab na vo āñkhoñ meñ ashk-e-ḳhūñ na vo dil meñ gudāz

ab na vo shām-e-tamannā hai na vo sub.h-e-niyāz

ḳhushk haiñ āñkheñ jabīneñ tañg siine sard haiñ

ab na vo dukhte hue dil haiñ na chehre zard haiñ

aah kī aur dil umañD aayā ye hotā hī nahīñ

Duub kar zauq-e-fanā meñ koī rotā hī nahīñ

phuul dāġhoñ se khile the jis dil-e-sarshār meñ

ḳhaak ab muddat se uḌtī hai usī gulzār meñ

āñsuoñ se nam jo rahtā thā vo dāmāñ jal gayā

lahlahātā thā jo siine meñ gulistāñ jal gayā

ruuh meñ bālīdgī kī quvvateñ ma.adūm haiñ

donoñ āñkheñ āñsuoñ ke faiz se mahrūm haiñ

pech-o-ḳham se bahne vaalā dil kā dariyā ḳhushk hai

vo bharī barsāt ya.anī chashm-e-bīnā ḳhushk hai

ḳhuun hai dil meñ magar pahlī sī tuġhyānī nahīñ

abr hai bād-e-muḳhālif se magar paanī nahīñ

jab ye aalam hai to bārish kī shikāyat kis liye

be-mahal ye hasrat-e-bārān-e-rahmat kis liye

ik mujassam ḳhushk-sālī ḳhud hamārī zaat hai

zid hamārī hastiyoñ kī abr hai barsāt hai

rahmatoñ se josh meñ aane kī ḳhvāhish kyā kareñ

ḳhud sarāpā qaht haiñ ummīd-e-bārish kyā kareñ

ai dil-e-afsurda wo asrar-e-baatin kya hue

soz ki raaten kahan hain saz ke din kya hue

aansuon ki wo jhaDi wo gham ka saman kya hua

tera sawan ka mahina chashm-e-giryan kya hua

kya hui baala-e-sar wo lutf-e-yazdan ki ghaTa

aasman-e-dil pe wo ghanghor irfan ki ghaTa

ab wo nalon ki garaj hai ab na wo shor-e-fughan

ab na uThta hai kaleja se mohabbat ka dhuan

apne afal-e-siyah par ab pashemani nahin

ab pasine ke sitare zeb-e-peshani nahin

dard ki muddat se ab dil mein chamak hoti nahin

wo tapak chhaalon ki kaunde ki lapak hoti nahin

zikr-e-maula se labon par ab wo narmi hi nahin

bhap sine se uThe kya dil mein garmi hi nahin

ab sharare soz-e-gham ke dil mein rahte hi nahin

ashk ab pichhle pahar aankhon se bahte hi nahin

marifat dil mein na ab wo ruh mein ehsas hai

log kahte hain ki hai lekin hamein to yas hai

ab na wo aankhon mein ashk-e-KHun na wo dil mein gudaz

ab na wo sham-e-tamanna hai na wo subh-e-niyaz

KHushk hain aankhen jabinen tang sine sard hain

ab na wo dukhte hue dil hain na chehre zard hain

aah ki aur dil umanD aaya ye hota hi nahin

Dub kar zauq-e-fana mein koi rota hi nahin

phul daghon se khile the jis dil-e-sarshaar mein

KHak ab muddat se uDti hai usi gulzar mein

aansuon se nam jo rahta tha wo daman jal gaya

lahlahata tha jo sine mein gulistan jal gaya

ruh mein baalidgi ki quwwaten madum hain

donon aankhen aansuon ke faiz se mahrum hain

pech-o-KHam se bahne wala dil ka dariya KHushk hai

wo bhari barsat yani chashm-e-bina KHushk hai

KHun hai dil mein magar pahli si tughyani nahin

abr hai baad-e-muKHalif se magar pani nahin

jab ye aalam hai to barish ki shikayat kis liye

be-mahal ye hasrat-e-baran-e-rahmat kis liye

ek mujassam KHushk-sali KHud hamari zat hai

zid hamari hastiyon ki abr hai barsat hai

rahmaton se josh mein aane ki KHwahish kya karen

KHud sarapa qaht hain ummid-e-barish kya karen